Aoer ajaki Chungli O angazükdi

~ Tiatoshi Longkümer, Kohima.

Kohima town nung aliba Aoer lanurtem noklang nung tukor (90%) shi agi Nagamese dang jembir aser jembinür. Ni iba ya tangar oshi balaka jembiba kintem den jembiba indang ashir masü, asen Aoer-i Aoer den jembiba indang ashir. Pei oshi mejembinütiba kinji tanü Ao lanu asensortem ya lir. Iba tia ya kechi nungi tenzük aser kong nung atemtsü, aji ni yangi meshitettsü. Saka asen Ao kin oshi-oben jenjang ya joko kanga mejungi kümogo anungji asenoki tang kechi koma mera tasen agi nung teimla ka bener arutsü ibaji dang ni tatsü agi lemsatepnür.
Asen Aoertemi oshi ana jembir-Chungli aser Mongsen. Ano telok tila kati Changki oshi jembir. Chungli, mongsen aser Changki oshi asem nungji kabosa nisung shia pei tetsü oshi lir. Saka asen kin dangi American missionary tem arudang parnok chungli o jembir yimtak tama atong nung joko iba mapang nung jagi chungliji asen Ao kin asoshi tongtibangtiba oshi aküm aser tanü tashi chungli o-ji zülu-panglu nung aser lokti sentep-senden ajak nung amshiba oshi lir. Tangar kin danga iba oshi ya sayu aser kaketshirtemi-a iba oshi nung zünga tatidang agütsür. Atangji, chungli O-ji Ao oshi lir.
Aotsür-Aoer rongnung oshi-oben len tebilemtsü kaji aikati pei tetsü oshi, Mongsen mesüra Changki-bo ashi saka Chungli mejembiteter ta asüba ya lir. Tanü lanu asensortem asoshi dang masü tsüraburtem-a dena iba ya tebilemtsü tulu lir. Mongsen nung aser Engraji nung abensa jembiteta meteta liakasa, chungli o nung junga mejimbitetba ajanga aikati lokti sabang magitetba tia lir. Asenoki Ao oshi mashiba indang jembidang tanü asüng lanurtem jenjang dang bilemer dang ashi, ano tsürabur aser tantsü-tambu aikati chungli mashi aser mejimbiteter. Iba ama jenjang nung asenoki kechi inyak nung asen Ao oshi-chungli o angazüktsü?
Ao oshi (chungli o) renloktsü asoshi inyakyim aika tenzüka lir. Ajakji tongtibang. Ajisaka kü tebilemba nung asen Aoer kibong shiai inyaktsüba tongtibang kaji, kibok ajak nung chungli o jembitsüla. Talisa, Aoer-aotsür shirnok chunglir kibong masü item kibongtem nung anogo nung ghonda ishikabosa chungli o jembiteptsü nüngdaker. Iba ya town nung alir atema dang masü, saka yimtak yimtsüng nungang kanga tenüngdakba asütsü. Tetenzük nungbo aika asoshi iba ya temenünütsüka asütsü. Auh, aji tim dang. Saka iba ama lokti tayongzükba ka metetsümonga tang metenzükra, asenok ano aika taküm alidangsa asen Aoer rongnung chungli jembir makai akümtsü.
Küm ishika ogo, ni America lima nung kaketriju nung azüngba mapang, China tsür kou mejeber ka dangisa mapang shia kou mejebi ao. La ya America nunger temesüng nisung ka den kibong kümer joko senso küma yangji alir. Saka lar jala-jabaso shiaji high school nung azüng tenzüktsü mapang nung küm anabosa China lima nung oor yangji lia China oshi Mandarin angazüktsü yoker. Iba ya parnok compulsory ozüng lir. China nunger America senso kümer America lima nung liaka, parnok pei oshi angazüktsü asoshi compulsory ozüng lira, asenok Aoer pei-pei lima nung lia tetsü taso O mashitsüsa küma aoba ya kanga dang lendong aser maaksü tulu lir.
Mapa ajakji meranga inyaka aliba ajanga dang takok angur. Engraji nunger shin o ka nung ashiba ama, “good practice makes a person perfect” asenoka chungli oji metangtangi meranga jembitep nung ang junga jembitettsü. Tang nungi ano tali sabua Aoer kibong ajak nung, talisa Mongsen aser Changki oshi jembir kibongtem nung, chungli o ya kinunger rongnung jembidi. Yamai inyak nungbo, ni amanger, asen Ao oshi chungli O jembiba nung terenlok tulu adoktsü. Nai-a iba onük nung koma bilemer aji lemsatepra iba jagi tanü Ao oshi-ojen asüngsashiba nung shilem tajung agir asütsü.