Upper Assam nung tzümetsüng agi nüburtem aika kangshidar

Dhemaji, Rongjui/September 20 (Agencies): Brahmaputra ayongnu tem nung tzü asemshia oaka tang tashi Assam kübok Dhemaji district kübok yimtsüng 94, Lakhimpur district nung yimtsüng 15 aser Majuli nung yimtsüng 10 tang tashi tzü agi metsüngbanger lir.
The Telegraph nung osang ka ajanga ashiba agi, tawa aruba tzümetsüng ajanga Dhemaji district kübok revenue circles pezü nung yimtsüng 221 kongshiogo. Kasa mapang nung Lakhimpur kübok revenue circles asem nung yimtsüng 76 aser Majuli nung yimtsüng 30 kongshia liasü.
Dhemaji Deputy Commissioner RA Korati-i ashiba agi, Tzümetsüng agi kongshir aliba nüburtem administration-i agütsüba tarpaulin sükitem nung jenoka lir. “Onoki nüburtem tenemleni anir atutsü asoshi takok tashi inyakdar. Tenüngdakba osettem mapang shidak nung agütsüdar,” ta lai ashi.
Arunachal Pradesh nung tzünglu kanga sashia aruba ajanga district asemprongla ya metsünga liasü. Ajisüaka Lakhimpur district nungbo North Eastern Electric Power Corporation Limited (NEEPCO) puri Arunachal Pradesh kübok Lower Subansiri district nung aliba Yajuli Dam nungi tzü chiokba ajanga metsüng.
Osang ajangasa ashiba agi, Dhemaji district nung nisung 29,545, Lakhimpur nung 3,000 aser Majuli nung nisung 1,500 iba tzümetsüng ajanga kongshiogo.District asemprongla nung district administration-i takok tashi nüburtem anepaludar. Kasa mapang nung Arunachal Pradesh anüdoklen kinük nung aliba tesemtem anentsü aluba sülen tang tashi linük nung tanungba tesemtem den mesendaktepteti lir.