Tsüngremi mulungba ama jashiba agi tekümtet asoshi temulong meyipdaktsür

~ L. Kika  Pongener.

2Korint-7:10. “Kechiyong Tsüngrem mulungba amato jashidaktsüba agi tanaben mesasatsüsa tekümtet asoshi temulong meyipdaktsür. Saka alima tejashibai-bo tasüba adokdaktsür”. Khristan taküm ka iba temenen lima nung, temenen den meyoktepa alidang, temenen lenmang nung jaja-a, memeteti temenen tatidang nung tsüker, aser metsüdaker alanger aser temenen nem moksepdaktsür. Paul-i ashiba Tsüngremi mulungba amato jashidaktsübaji kechi komala dang ajar ta bushidangra, kodang temenenpur kati pei temenen nungi temulung meyiper, pei temenen bilemteta, pa sasa pa dang jashia nunga jepdir, ibaji Tsüngremi mulungba amato jashidaktsübaji asütsü sudi. Tetezü, ” Pei temenen asoshi jashia ajepba “. Dawid chuba-a mapang ka nung, temenen tatidang mekokteti temenen kangla nung asonger lia, pai iba temenen nungi temulung meyipa, Tsüngrem dang menangzük tashi, anogo piyong anungba agi pa lurepdaktsü. “Kodang ni kü temenen menangzüki ali, anogo tepiyong anungba agi ni lurepdaktsü” Idangji ni kü temenen ne nem metetdaktsü, aser ni kü tai miima mayu. Ni ashi, “Ni kü ozüng raksabatem Kibuba dang nangzüktsü, aser kü ozüng raksaba tai nai atok” (T.Ken-32:3 & 5). Aji oda, Dawid-i kodang pai menaba temenentem miima mayu, Tsüngrem nem metetdaktsü, aser tatok nangzüka sarasadem, Tsüngremi pa tai atok. Aser kodanga mesasatsüsa pa mulungjangi tepela ka aru. ” Hau, ni kü tai nangzüker, kü temenen asoshi ni jashiseter ” (T.Ken-38:18). ” Kü tai ajak nungi meshimeshia ni shitokjang, aser kü temenen nungi ni meruktetjang, kechiaser ni ozüng raksaba taitem nangzüker, aser kü temenen teti kü jakdang lir. Na anema, na anema dang ni temenen menaogo, aser ne nukdang kechi majung aji inyakogo” (T.Ken-51:2 – 4).
Kodang asenoki Dawid ama asen temenen asoshi jashia jeba-a, Tsüngrem dang tatok meshia sarasademdir, tanaben mesasatsüsa asen dangi tepela mulungjang tasen ka arutsü, kechiyong Tsüngremi asen tai teti asoshi tatok agütsütsü. Mapang ka nung Hezekia chuba dangi Isaia ainkar aru, aser pa dang yamai ashi, Ner ki tiptema yuang, kechiyong na asütsü. Idangji Hezekia tejak jara tsütsü meyip aser Kibuba dang sarasadem. Aser Hezekia chuba kanga ajep. Idangji Kibuba o tanaben Isaia dangi aru, “Oang, aser Hezekia dang shiang, Ni ne sarasademba angashiogo, ni ne nuktsü ayimba nguogo”. “Ajiang ni ne arishi küm ter pongu enloktsüogo” (Isaia-38:1-5). Aji oda, Tsüngremi Hezekia kanga jashia ajepba angashi, aser pa nuktsü yima sarasademba ngua aochia bilem, aser pa nem küm ter pongu arishi sukloktsü. Tsüngremi asenok mimchir-i pei temenen asoshi jashia nuktsü yima jepa sarasademba aginur aser asenoki dang asen temenen nangzüka temulong meyipra, pai asenok dang asen tai temenen atoktsü aser taochi sayutsü. Ajiser, Tsüngremi kodang asenok nem tatok agütsüdir, joko aji kodanga mebilemtettsü. Asen mimchirtem-ibo tatok agütsür külena mapang shia bilemtettsü akok. Saka Tsüngrem o-i ashir, “Aser parnok temenentem aser parnok taitem ni joko mebilemtettsü” (Ibri-10:17).
Hezekia chuba jashia nuktsü yima sarasademba ajanga, kodanga mesasatsüsa tepela tesunep angu aser pa arishi küm ano ter pongu tashi sukloktsü. Anutoklen alir takar nisung ka tenung agi Yob, pai pa Temeshi nisung ama bilem, aser pa Temeshi nisung sernung kodaser pa dangi timtem tekangshi ya oda arur, ta Tsüngrem anema nemnem. Yob-i ashi, “Ni temeruk, ozüng meraksa, ni tai maka, kü dak temenen mali “. (Yob-33:9). Ano Yob-i ashi, ” Ni temeshi aser Tsüngremi kü temeden rakzükogo. Ni shidak liaka, ni timatemer, ni ozüng meraksai liaka, kü komo maneper ” (Yob-34:5-6). Saka kodang pa tembar Elihu-i pa dang Tsüngrem dak alaka alima nungbo shinga temeshiba mali-a ta tejangja angatetdaktsü, idang-jiang Yob-i aoyi aser aut manung mener temulong meyipa ashi, ” Shisatsü makaba o agi Tsüngrem tebilemba mimbangba ya shiba ? Anungji ni mangateti jembiogo, “Kü narong agi dang ni ne indang angashi, saka tangbo ni kü tenuk agi na angur”.
Aji asünung, ni kü sasa ni aitsür, aser aoyi aser aut manung mener ni temulung meyiper” (Yob-42:3-6). Aser kodang Yob-i pa temenen asoshi jashia jepa Tsüngrem dang tatok nangzük, Tsüngremi Yob tia melentsü aser pa rongsen mezüng akaba dang nungi anasü agi tali agütsü. Shirnoki pei tai temenen asoshi jashia jepa Tsüngrem dang tatok nangzükdir, tanaben mesasatsüsa tekümtet asoshi temulong meyipdaktsür. Tsüngrem o-i ashiba ama, temenen asoshi jashibaji, aji Tsüngremi mulungba lir, aser iba jashiba jagi kodanga mesasatsüsa teti taküm senmang tekümtet renemtsür. Temenen asoshi nunga ajepba iba tejashi-baji Tsüngremi kanga aginur aser pa tsüngdang senti lir, saka alima jashiba agibo tasüba-ang adokdaktsür. ” Kechiyong temenen taa-ji tasüba lir ” (Rom-6:23). Asenoki dang asen temenen asoshi jepa tai tatok nangzükra, Tsüngremi asen tai atoktsü renema dang lir.