Temerük taküm

Nisung ka taküm nung jembishinü aser inyaksangshi ajak pei mulungjang nung bilemba nungi adoker. Anungji, shirnok mulungjang temerük aser tasüngtet lir, parnoki inyakba mapa ajakji temerük aser parnoki tangar dak tajung dang angur. Ajisüaka, shirnok mulungjang memerüki ali parnok asoshibo ajak memerük, anungji parnok mapa aser taküm yimya memerükba dang masü saka parnoki tangar daka memerük aser majungbatem dang angutsü. Iba jagi tenyar Paul-i Tita dangi züluba Tita tapu 1:15 nung,” merüka alirtem asoshiba ajak temerük saka shirnok menena lir  aser mamanger, parnok asoshibo kecha temerük masütsü,” ta shia angutsü. Shirnoki memerükba mapatem inyaker aser mamangertem lir, parnok shisatsü aser tekolok ajungaji menena lir, anungji temenen mapa inyaktsü dang bilemtsü ta kasa tapu nung shia angur. Mathi tapu tenet nunga asenok tenük nung anak aliba tamasa endok nungang asenoki tangar taküm indangji jangjajangjaa angutsüba indang shia lir. Asenok shisatsü aser tekolok nung tamajung aser ochimashi mapa inyaktsü bilema ali tashi, asenok menena lir, anungji asenoki tangar daka tajung tilakata mangutsü. Asenoki shinga daka temulung malemtsü. Nai nü mulungjang nung kechi inyaktsü bilemer, iba kasa temenen mapatemji tangartemia inyaktsü bilemer ama dang nai bilemtsü. Tangari tajung ashiyonga asen mulung nung tamajung bilema lira, asenoki mamangtsü. Iba ama shisatsü menena aliba nisung asoshibo ajak temenen dang angutsü ta Laishibai ashir. Ajisüaka, kodang asen shisatsü aser kolok merüka lidir, asenoki tangari tajung ashiba nung temulung alemtsü. Asenok shisatsü merüka aliba ajanga asenoki tangar daka tajung dang reprangtettsü aser tenüng asangtsü. Mathi 6:22 nung ashir, asenok tenük junga lira asenok temang ajak tesangwa asütsü, anungji asenoki tangar daka tesangwa angutsü. Shirnok temulung temerük lir, parnok asoshibo ajak temerük lir ta Tita tapu nung ashibaji ibaji lir. Kodang asenok temulung temerük agi tangar dak repranger aser tajung angur asenok pelar, kechiyong temulung temerükji taküm ka asoshi tepela poktetdak lir. Iba kasaji, asenok tashimait taküm süaka Tsüngrem mulung temerük agi Pai asenok aochia repranger aser meimer. Asenokia tangar taküm mapa nung koma repranger ? Asenokibo tangar dak tamajung-tamajung dang angur asü ? Asenokibo tangar kisüng aitsür asü ? Iba amaji asenoki tangar obendangra, asenok mulungjang memerüki lir ta asenoki angatetdi. Iba amaji asenoksasa asenok mepelatsüsa tangar dak asenok metsüdaka lira, Tsüngrem dang asen mulungjang merüktetjang ta sarasademdi. Kodang Pai asen mulungjang merüka kümdaktsüdir, idangjiang asenokia asensasa asen dak tajung angutsü aser tangar daka tajung reprangtettsü. Tsüngremi ashiba angaa, iba lima nung temerük taküm alitsübaji jangratemtsüka lir. Temerük taküm asoshibo ajak temerük kechiyong temerük takümi tamajung aser ochimashi mapa inyaktsü tebilema mebilemer. Iba temerük takümji milen ama akümer , anungji amang nung alirtema dena sangwatsür. Iba amaji, asenok Khristan taküm ya tangar shisaboludaktsür mesüra aitsür masü saka tangar peladaktsür temerük taküm kaka asütsü merangdi.