China-i US den sensaksemtsü thitsü

Shanghai, Rongjui/September 22 (Agencies): China den shishilembaba tsütsü mangatettep aliba bentettsü asoshi United States-i temulung lema bilemer saka shishilembaba tsütsü Beijing telangzüba tang asadangdar aser ken o jembishinütsü atema anogo tejangja ka lemteta mali, ta White House ketdangser kati Rogonü ashi.
Ketdangserisa, parnoki anemaka China-i U.S. takhangba jangjaa meteta lir koba Washington-i ashiba agi shishilembaba tsütsü parnok inyakyim shidak masü. U.S. tir Donald Trump-i iba ken o dak sendakba nung pa tamendakdak jangja jangja metetdaktsügo, ta ketdangseri ashi.
“Onoki kechi nungdaker aji senden ajak nung jangjaa metetdaktsüogo. Ni tejakleni aotsü asoshi lenmang sadema lapoka lir ta amanger aser tir-ia onok nem meneni mangatettep benteta tejakleni aodaktsüner,” ta paisa ashi.
Wall Street Journal nung China-i shishilembaba tsütsü United States den senden ayonga aliba aser vice premier Liu He-i taruba hopta Washington semdangtsü aliba methitsü tsüngda ketdanger-i iba olen ya shia liasü.
Iba hopta tetenzüklen China-i parnok indang import tariff list nung U.S. products tem nung USD billion 60 bendenloktsüogo koba US-i China nunger osettem nung duties USD billion 200 bendenloktsüba dak sendakba nung telangzüba ka liasü.
White House nung osangbenertem den sensaksemba mapang ketdangseri ashiba agi, administration-i US aser China na tsüngda tesendaktep meraksatsü asoshi nükjidong nung inyakdar, saka Beijing-i parnok inyakyim memelenshira company temi parnok indang supply chain melenshitsü akok.
Paisa Canada-i, iba ita tatemlen U.S.-Mexico trade deal nung adentsü imlaba lemsatep.
U.S. aser Canada nunger ketdangsertem North American Free Trade Agreement dak sendakba nung sensaksema arudar.