Saddam Hussein ama Trump tamakok angutsü: Hassan Rouhani

Dubai, Rongjui/September 22 (Agenceis): Iraq nunger lenir Saddam Hussein ama US tir Donald Trump-a tamakok angutsü, ta Küptoknü Middle East nung linük tashi tait ana tsüngda rara indang ateshia Iran tir Hassan Rouhani-i ashiba den Tehran-i parnok indang missiles tem metoktsütsü, ta ashi.
Monupi/May nung Trump-i multilateral nuclear deal nungi atsünginba aser taoba ita sanction balala agütsüba sülen Iran aser United States na tsüngda tesendaktep mejungi kümogo.
1980 nungi 88 tashi Iraq den rara tenzükba bilemtetba nüngtem nung Bandar Abbas port aser linük yimtiba Tehran nung annual parades sentong akaba mapang Iran-i Gulf nung parnok indang naval power sayu tenzükogo.
Iran-i tawa U.S.-i sanctions agütsüba dak sendakba nung telangzüba agütsütsü asoshi Gulf nung tanga linüktem totzü export mesüdaktsüi military action agitsü akok ta shiogo.
“Saddam Hussein dak atalokba kasa Trump dak ataloktsü,” ta Rouhani-i o jembidang ashi koba state television tem nung live sayuogo.
“Iran-i prangbong hadirtem metoktsütsü aser iba nung missile tem densema lir, koba ajanga America kanga meit adokdaktsür,” ta paisa ashi.
State media-i ashiba agi, Küptoknü Gulf naval drill nung vessel 600-i shilem agiogo aser iba masüdang anogo ka tejakdang parnoki aerial exercises agiogo aser ashiba agi, par linük anemertem atema telangzüba agütsütsü ataa lir.