Senden thitsüba atema Imran Khan-i India aitsü

New Delhi, Rongjui/September 22 (Agencies): Kashmir nung police asem tepsetba dak sendakba nung foreign minister jenjang nung ken o jembishinütsü asoshi India-i thitsüba sülen anogo ka lir Pakistan Ato Kilonser Imran Khan-i tanü ashiba agi, Indian administration nung “nisung tila”(small men) lir shirnok nükla mali.
“Yimjung asoshi ken o jembishinütsü atema ni benokba India-i magizükba atema ni kanga tezüadanger. Ajisüaka kü taküm peyong tilari mapa tulu abenba ni ajangshiogo, shirnok dak wadang tuluba awawa inyaktsü asoshi nükla mali,” ta Khan-i tweet asü.
External Affairs Minister Sushma Swaraj aser Pakistan External Affairs Minister Shah Mehmood Qureshi na taruba hopta New York nung United Nations General Assembly akaba mapang ajuruteptsü asoshi sentong liasü aser linük ana tsüngda mangatettep aliba iba summit ajanga temelenshi tilakabo bener arutsü imlaa liasü.
Ajisüaka Rogonü special police officer asem khasetba sülen ghonda ishika lir India-i iba senden thitsü. India-i ashiba agi, Imran Khan indang jakla chichiba sayuogo. Maneni Islamabad-i Hizbul Mujahideen terrorist Burhan Wani densema stamp 20 sayaba dak sendakba nung mepelaba India-i lemstepa liasü.
Iba amala tensa ka nung yimjung ken o jembishinütsüji kecha tetezü mali, ta Foreign Ministry otongdar Raveesh Kumar-i ashi.
Kasa mapang nung Qureshi-i ashiba agi, linük ana tsüngda jembishinü athiba ya kanga tia maka aser India administration-i internal pressure aliba ajanga iba senden athi ta paisa ashi.
“Foreign ministers’ senden akatsü ghonda 24 dang lia thitsüba kuli India-i agütsüba ajanga temulung masür,” ta Pakistan Foreign Ministry sangdong ka ajanga metetdaktsü.