Tangar ama tejashi

Saka, adianutem, teyimla makaba tangar pur ama, nenoki mang mayimtsü asoshi, onoki nenok nem amua aortem indang memeteti melidaktsüner. 1 Tesa. 4:13.
Khristantemi alimai jashiba ama mejashir. Alimai teyimla makai tejashiba ajurur. Khristan ka ama tejashi kar saka khristantem tejashi den teyimla kar.
Yisu mapang nung asü pila sentepi maremzükteti jashiba tamaitsü sayuba liasü. Tasür dang akhümtsübu sayuba tamaitsü tashi agi arunga ajeb. Temeimer ka asüba atema jashiba nübui kechi atalok ibaji melenshitsü tashi mali asü? Asü pila nung meimchiri teyimla maka ta metetba dak alema tuluba ajangshiba mapang mali.
Pa temba ka asüdang, Yisuia ajeb saka pa tejashiji teyimla makaba nungi adokba masü (Yn. 11:35). Lazar yakta shia arutsü ta Yisui metetta liasü. Ano Yisui pa tanaben arudang Lazar aser pa nütsüngtem ajak pa den kotak nung alitsü tasü nungi shia arutsü ta metetta liasü.
Yisui ajeb kechiaser pai meimba pur mulungjang teyimla samaba pai angu. Pa tembartem shia aruba aser taküm parnok nung liasü, aji saka parnok jashia liasü (Yn. 11:25). Kodang Yisui tasü madak takok angu, Pai teti asoshi tasüba khristan tangatet melenshidaktsü. Tanga temeimer ka asüdang khristantemi tejashi ajuruba asenoki angur saka asenok teyimla kar kechiaser mashi tia nungi Tsüngremi tajung bener arutsütsü ta asenoki metet (Rom 8:28). Kechaia tasübaia asenok Tsüngrem temeim nungi piladaktsütsü makok ta asenok teyimla kar (Rom 8:38-39). Asenok teyimla ka kechiaser Yisu den teti tatem maka tepela telungjem Yisui bener arutsü aser iba telungjemji Kechaia menokdangtettsü ta asenok teyimla kar (Yn. 14:3).
Na khristan ka süaka taküm tejashi nungi jenbua alitsü makok. Saka Khrista tasü nungi shia aruba teyimla nung nai ne tejashi sümentsü akok kechiaser Pa ne teyimla aser ne tesünep lir.