Bangladesh nungerji shibu mesük; Voters List nungi agientsü: Amit Shah

Jaipur, Rongjui/September 22 (Agencies): Tanü BJP National Tir, Amit Shah-i, Bangladesh nungi arurtemji shibu ang mesük, aser parnok ajakji electoral roll nungi agientsü, ta metetdaktsü.
Tawa Assam nung sangdongba National Register of Citizens (NRC) dak sendakba nung Amit Shah-i, BJP sorkari NRC mapatong benok, aser mezüng bushisüngdangba ajanga ozüng alema arua alir nisung lakh 40 jangjaogo, ta metetdaktsü.
Sawai Madhopur district kübok Gangapur nung lokti senden ka nung jembidang pai, BJP sorkari ozüng alema arua alirtem ajak jangjatsü, ta ashi.
Taküm küm tatemlen Rajashtan nung assembly election agitsü aliba atema BJP aser Congress Party naprong renemshidar; tan ita tetenzüklena BJP Tiri Rajasthan semdanga liasü.
Tanü Shah-i, “Rajasthan nung BJP sorkarji manokshitsütettsü . Congress-i linük atema tajung kecha meinyaktsütettsü, kechiyong party nungji lenir ka mesüra asalentong ka mali,” ta ashi.
Paisa, Congress sorkar mapang nung Rajasthan ya ‘shiranga aliba’ state ka liasü, ajisüaka chief minister Vasundhra Raje-i meranga inyakba ajanga terenlok bener arutsüba den state aser Centre sorkar napronglai terenlok projects benoka inyaktsüogo, ta shisem.