Vijay Hazar Trophy nung Nagaland team-i mezüngbuba takok nguogo

Dimapur, Rongjui/September 22 (TYO): Tang Nadiad, Gujarat nung tasayadak All India Vijay Hazare One Day trophy Group-D asaya nung Nagaland Senior (Mens) Cricket team-i mezüngbuba takok ngutetogo. Parnoki Meghalaya madak wicket 7 agi takok angu. Asaya nung Meghalaya-i toss akok aser mezüng bat asütsü shimtet.
Kasa asayamung mezüngbuba asaya nung Rongjui/Sept 19 nü Nagaland team Bihar team-i kokogo. Parnok taruba asaya Sikkim den Rongjui/Sept 23 nü Vadodra nung asayatsü. Iba takok ya otsüsütsüka lir kechiyong Nagaland team-i BCCI first class trophy nung mezüngbuba takok ngutetogo.
Mezüng bat asüba nung Meghalaya team-i over 50 nung wicket 6 out sür run 246 yanglu. Parnok rongnungi Raj Biswa-i ball 99 nung run 71, Yogesh Nagar-i ball 64 nung run 58, Gurinder Singh-i ball 49 nung run 57 aser Punit Bist-i ball 35 nung run 34 yanglu. Nagaland team nungi bowler tem rongnungi Tahmeed, Nitesh, Hokaito aser Imliwati nungeri wicket kaka agi.
Asaya tanabuba shilem nung Nagaland team bat asüba nung parnoki over 47.3 nung wicket 3 out sür run 247 yangluteta parnoki asaya akok. Nagaland team nungi K B Pawan-i ball 131 nung run 113, Sedezalie-i ball 92 nung run 50 aser Jonathan Rongsen-i ball 49 nung run 43 yanglu. Meghalaya nunger bowler tem rongnungi Abhay Nagi, Gurinder aser Sylester nungeri wicket kaka agi.