24th Angetyongpang A/C Independent Party-i mangyimer

Mokokchung, Rongjui/Sept. 23 (TYO): Nagaland state Sericulture & Excise Advisor aser taoba NLA Deputy Speaker, walunir Imtikümzük Lkr, Rongjui/Sept. 22, 2018 anogo nung New Delhi nung ajungbena asüba osang angashia aoksar aser melung züreper, ta tanü 24th Angetyongpang A/C Independent Party Tir, Nungshimangyang aser tongti tezülur, Repachuba nati sangdong ka ajanga metetdaktsü.
“Asür Imtikümzük-i Assembly züngsem ka aser Advisor ama lenir tajung kati inyakba mapatemji asen nüburi teti bilemtettsü. Pa asüba ajanga Nagaland nung lenir tajung ka makai kümogo. Pai anojungi iba lima toktsür aoba ajanga Nagaland atema ongdang tulu ka adokogo, aser iba jagi asen lima khenbo raremtsü tsüremseta bilemer. Pa asübaji par party atema dang masü saka Naga nunger ajak atema takoksa tulu asütsü,” ta kasa sangdong nung shia lir.
“Iba asükhu mapang nung 24th Angetyongpang A/C Independent Party-i mangyimer kibong den mangyim jashi lemsateper, aser ajak takoksang Tsüngremi mangyimer kibong aser kinüngertem nem tesünep den tashi tasen agüjang ta sarasademtsür. Tsüngremi asür tanela tatem makai tesünep nung anisüngzükdakjang ta sarasademtsür,” ta parnokisa lemsatepogo.