Dimapur nung Jacob-i AB-NHPM/PMJAY scheme tenzüktsüogo

Dimapur, Rongjui/September 23 (TYO): Linük rangben den liromedema tanü Dimapur nunga District Hospital, Dimapur nung Minister, PHE Nagaland, Jacob Zhimomi-i Ayushman Bharat, National Health Protection Mission/Pradhan Mantri Jan Arogya Yojna (AB-NHPM/PMJAY) scheme tenzüktsüogo, aser iba anogomong nüngtem nung minister-i nisung pongu nem e-health cards agutsü, ta tanü ketdangsertem osang ka ajanga metetdaktsü.
Iba sentong nung jembidang Jacob-i, iba scheme indang nüburtem nem angatetdaktsütsü atema district ajak nung seminars/programmes ayongzüka agitsüla aser yimtsüng nung aliba nüburtem nema iba scheme indang awareness agutsütsüla, ta metetdaktsü.
“Iba tajangzük ya loktiliba nung jenjang tekübok nung alirtem nem agutsütsüla,” ta pai ashi.
Kasa sentong nung ADC Dimapur, Albert Ezung-i, medical tsütsü technology kanga tejakleni oaka tang tashi health sector ya tebilemtsü tuluka lir, ta ashi.
Iba dak sendakba nung pai, item programmes ji yimtsüngtem nung aliba nüburtem nem metetdaktsütsüla, ta ashi.
Iba mission takok ngua inyaktsü atema village councils aser lenirtemi tongtibang shilem ka agitettsü, ta paisa shisem.
Iba sentong ya CMO Dimapur, Dr.Vikato Kinimi leniba nung agi, Chaplain DHD, Rev.Yhunlo Thong-i Tsüngrem temoatsü meshia sarasadem aser Medical Superintendent District Hospital Dimapur, Dr.Z.Kheshito Zhimo-i tepela anküp o jembia liasü.