BTAD nung Bodoland takhangba agütsüba ola adoker

Kokrajhar, Rongjui (September) 24 (Agencies): Deobarnü All Bodo Students Union (ABSU), Peoples’ Joint Action Committee for Bodoland Movement (PJACBM) aser NDFB nung telok ana longjemer Bodoland balaka tentettsü takhangba ola adokogo.
Udangshrini Alari Premsing Brahma Memorial Playground nung sentong ka ayonga agidang Chirang, Kokrajhar aser Assam kübok tesem balala nungi nisung 100,000 shi ka adenshia shilem agi.
Assam nung senzüka toktsüba aser tangar memenepba kintem atema Bodoland balaka tentetang ta parnoki takhangba agütsü.
General election 2014 matongdang Bharatiya Janata Party (BJP)-i nangzükba poster aser banner tem amer lungkak aitertemi shilem agi, BJP-i sorkar akümtsü atema vote agütsüra Bodoland state balaka tentettsü ta BJP-i nangzüka liasü.
BJP-i ashioktsüogo anungji Prime Minister Narendra Modi aser Union Home Minister Rajnath Singh nato küm pezü ser tesadang tejakdang nangzükba ama inyaktsüla, ta parnoki takhangba agütsü.
Sentong nung taoba Rajya Sabha member U G Brahma; S K Bwisumuthiari, taoba MP; Gobinda Basumatary, general secretary, NDFB (P); Rakesh Boro, chief convener, PJACBM; B Anjalu, general secretary, NDFB (R) aser tangartem aden.