19buba NSF Martyrs’ Memorial Trophy 2018 ; Friends United aser Kohima Science College-i kokogo

Kohima, Rongjui/September 24 (TYO): “Goal for Peace” nung ajemdaker Angami Students’ Union (ASU)-i ayonga Kohima Local Ground (Khuochiezie) nung tang tasayadak 19buba NSF Martyrs’ Memorial Trophy tanü asaya nung Friends United New Market Kohima aser Kohima Science College nati pei tata asaya koka round of 32-i iogo.
Tanü asaya mezüngbuba nung Friends United-i 5-1 agi Thürüsüswümi Students’ Union madak takok angu. Iba asaya nung Gideon Leo-i hat-trick ka agüja asayamung nung mezüngbuba hat-trick agütsür kümogo. Pai mezüngbuba goal minute 15buba nung idaktsü aser iba sülen goal tanabuba Thejaselie Terhüja-i minute 28buba nung idaktsü. Iba sülen Gideon-isa minute 30buba nung par telok asoshi tasembuba goal idaktsü. Thürüsüswümi Students’ Union pur atema goal ka ya Verazo-i idaktsür goal 3-1 nung asaya mezüngbuba shilem tembang.
Asaya tanabuba shilem nung Gideon-i pa asoshi goal tasembuba aser par telok asoshi goal pezübuba minute 61buba nung idaktsü aser Thejaselie-i minute 81buba nung goal 5buba idakja parnoki asaya akok.
Friends United nungi asayar Menguneizo aser Thürüsüswümi nungi asayar Mhaseveto na nem minute 36 aser 44buba nung yellow card kaka agütsü.
Asaya tanabuba nung Kohima Science College Jotsoma-i tie-breaker ajanga goal 4-1 agi Lower Jail Youth Organisation madak takok nguogo. Asaya tembangba tashi nung telok anapronglai goal 1-1 dang idaktsüba sülen tie-breaker asayatsüsa aküm.
Asaya nung mezüngbuba goal Science College nungi asayar Kheleto-i minute 40buba nung idaktsü aser iba sülen minute 76buba nung Lower Jail Colony pur atema Sancho-i goal ka idaktsü. Ajisüaka tie breaker asaya nung Science College goal keeper Allong-i goal ana tashi nokdangba ajanga goal 4-2 agi parnoki asaya akok.
Rongjui/Sept 25 nü asaya:
1. Tribal Brothers vs A Yhome FC @ 12Noon
2. Fortunate Youth FC vs Jakhama YO @ 2pm