Imkonglenden, Ura Vila, Mao Colony nung relief agutsü

Dimapur EAC, Tokai V Sumi (ajichilen nungi tasembuba) aser CECS Director, Subonenba Longkumer na den tangartem tangokba noksa nung angur.

Dimapur, Rongchii/Sept. 24 (TYO): Tanü Community Educational Centre Society (CECS) den Development Opportunities Resources Access Insight (DORAI) Foundation nati tawa Imkonglenden, Ura Vila, Mao Colony tem nung tzümetsüng agi kongshia timtem ajuruba kibongtem nem teyari oset balala agutsüogo.
Teyari osettem rongnung chiyungtsü balala den süoshi aser kidang nüngdakba osettsüset densema liasü.
Relief osettemji DORAI Foundation, Chennai-i agutsü aser CECS-i lemja liasü. Iba sentong nung Dimapur EAC, Tokai V Sumi, kiyong asem nungi Council lenirtem den GBs aser CECS Director, Subonenba Longkumer densema liasü.
Iba sentong nung jembidang EAC-i Dimapur district administration tenüng nung DORAI Foundation dang pelaba lemsatepa liasü.
Paisa item kiyong nung tzümetsüng lendong mataloktsü atema kilentzü aodak junga anepalutsü nüngdaker, ta ashi.
DORAI Foundation-i state nung tzümetsüng lendong ajanga takoksa angurtem nem teyari osettem agutsüba atema pelaba lemsatepdang CECS Director, Subonenba Longkumer-i distributing partner asütsü atema CECS dak melung lemtetba atema pelaba metetdaktsü.
Item teyari osetji tzümetsüng agi tamajungba kongshir kibong 58 nem agutsüogo.