Mekülaokdaktsütsü kümdangdi

Dimapur tashi nung aruagi “Call Center’ lapoka yur telephone agi jembiba ajanga America nunger dena külaoktsütsüsa inyakba mapaji asenok asoshi taoksatsü aser tekümdangtsü mapa ka lir. Alima nung tia majung kaji nisung karibo pei taküm lia aotsü atema senotsü bushiba maparentem ya masüba lenmang aser taila mapa inyakbatem nungiang tajangzük bushia inyakner. Ibayongji, kari ozüngi nokdanga aliba machimajemtsü ayoker aser kari tang amaji yazüyapong jembia nisung külakokja tajangzük bushitsü meranger. Asen lima nunga nisung karibo government mapa bushitsütsü asoshi senotsü meshia inyakbaji pei mapa kümer inyaker. Ano, karibo taila project inyaka senotsü ajangzüktsü meranger. Atangji, iba ama taila mapa inyakba nungjia karbo ajangzüka alitsüa akok saka nisung aika tangar nem ashiokdaktsüba otsütem angashir. Ano, tanü asüng tekümdangtsü kaji India len yimti balala nung mapa agütsütsü atema nangzüker aiür asangurtem anir aoer, saka parnokji oa tongerbo asangurtema ita sen agi tebok masüng mapa tasak inyaktsüsa akümba aser aiürtema kangshia pei temang ayoktsüsa kümdaktsüba tia ajuruba otsü aika lir. Tazüngba tsütsüa, kaketreju tajung nung azüngtsüsa menden tajung bushitsütsü atema o tajung jembia aika ajurur saka parnok nemji sen agütsür odaktsübaji tao akümba tatalokba aika lir. Tanü putu nung item ama nisungi nisung ashioktsüba mapatemji zünger mezüngma lir. Ano, aiben kidangi memetetba nisung kanga junga sübor asenoki aginüba oset mesüra senotsü ajangzüktsüba lenmang sayua arutsü. Ajisüaka, itemji kodang aniketa mendaktsüdir, parnoki asenok amui odaktsütsü mozü amshitsü aser asenok amui orr alidang kidang kechisarina auyaa bener aotsü. Iba amajika meinyak nunga parnoki ayokba oset aser sayuba lenmangji taila asütsüa akok. Ano, aiben telephone ajanga asenok nem agütsütsüba sempet tajung renemja lir mesüra lottery nung sen aika adoka lir, anungji itemji agizüktsü atema sen (fee) tera nüngdaker ta ashitsüa akok. Iba ama tiyazü aser tekülak osang jagi nisung aika akoksadaktsüba osang angashiogo. Ano, khenkhenbo asenok dang bank nungi jembir amai ola agi mesüra sms ajanga asenok dang asen account dak aketba temetettsütem kar metetnüa asüngdangtsüa akok, ajisüka item temetettsütemji agütsüba ajanga asen bank account nungi aseni memeteti sen agizüka agiba otsütema lir. Asenoki aiben nisung ajak tajung amai dang bilemer, iba jagi tangari ashiba ajak nung amangadoker. Ajisüaka, tanü lima nung o tajung jembir aser lenmang tajung sayur ama sayurtem ajakji nisung tajung aser ochishir masütsü ta asenoki bilemtsüla. Asenokibo ajak meteta mali aser asenok ya tongmelang, anungji tangari ashiba nung jet ta amanger aser parnok den külemi mapa inyaker. Tang Dimapur nung tzümartem den külemi Naga nunger chanutem Call center nung inyakertemjia iba amaji mebilemdangi mapa tajung nguogo ta bilemer inyakertem asütsüa akok. Iba amaji tangar nem asenok mekülaokdaktsütsüsa asenok kanga kümdanga alitsüla. Tanü lima yabo tilaka dang lir, anungji kong südir süaka asenok nisung lir aser maliyonga asenoki jembitettsü aser jangjashitettsü, anungji asenok tonga maodang mesüra mapa nung mamdak dang, akok tashi nisung shitak bushia jangjashiteptsüla. Asenok asoshi tongtibang kaji akok tashi asenoki meinyak ser senotsü angutsü memerangtsüla aser masüba lenmang nungi mapa mebushitsüla. Ano asenok atema teinyaktsü kaji, kodangsa, nisung kari asenok külaoktsütsü amato jembidir mesüra inyakdir, jet ta kinunger aser medemertem den lemsateptsüla aser nüngdakra police-tem nema metetdaktsütsüla.