Wuhan Open: Wozniacki round tasembuba tongogo

Wuhan (China), Rongjui/September 25 (Agencies): Wuhan Open tennis asayamung tetsür kija Tentonü/Tuesday tanabuba round asaya nung World no. 2 Denmark tsür Caroline Wozniacki-i Sweden tsür Rebecca Peterson madak takok ngua round tasembuba tongogo.
Taküm küm Aenjeti/January Australian Open asayamung nung takok angula Caroline-i iba asaya nung 6-4, 6-1 agi takok ngua Rebecca tsükdaktsü. Iba asaya ghonda ka sür minute 28 nung tembang.
Aami/June Eastbourne International asayamung nung Caroline Wozniacki-i takok anguba sülen nungi la temang nung timtem ajurua liasü. Montreal, Cincinnati aser Tokyo asayamung asem tashi nung Caroline-i junga shilem magitetti aruogo.
Tanü Rasemnü/Wednesday round-of-16 nung Puerto Rico tsür Monica Puig aser Caroline na asayatsü.
Kasa asayamung tetsür kija round tanabuba asaya tanga ka nung seed. 5 nung alila Czech Republic tsür Petra Kvitova-i 6-3, 6-4 agi Serbia tsür Aleksandra Krunic madak takok ngua round tasembuba tongtetogo.
Taoba mapang Kvitova-i kasa asayamung anaben tashi takok ngua lir, aser taküm lai asembenbuba takok marok angutsü asoshi meranga asaya arudar.
Russia tsür Anastasia Pavlyuchenkova aser Kvitova na round tasembuba asayatsü jangjaogo.
Tanabuba round asaya tanga ka nung Anastasia-i Netherland tsür Kiki Bertens madak 6-4, 6-2 agi takok ngua tsükdaktsüogo.