Pharmacist temi tongti shilem agitsü ayongzüker

Kohima, Rongjui (September) 25 (TYO): Nagaland nung tanü “Pharmacist, your medicine expert” omen nung ajemdaker Pharmacist Day mungogo.
Iba sentong ya Nagaland Pharmacists-i ayongzüka amung aser Health and Family Welfare Principal Director, Dr Vikeyie Losu-i o jembidang ‘pharmacists-i mozü ayokba dang masü saka mozü agütsüba aser yiruyibongertem yariba mapatem inyaker’ ta ashi.
“Pharmacists-i doctor mesükba mapa tila inyaker saka ibaji health delivery system nung teyari tulu lir” ta paisa ashi.
“Tanü alima nung information technology kanga inogo aser kanga tongtipang kümogo. Pharmacists-i mozü nung mongin nisungtem akümtsü atema aser mozü shitak agütsütsü atema tajungba akümtsü merangtsüla” ta Dr Vikeyie-isa shisem.
Iba atema pharmacy shiaji sale person kati masü saka pharmacist kati ketdangsüa reprangtsüla. Nenoki shia meteta alibaji health care tajungba kümdaktsütsü atema amshitsüla, ta paisa ayongzük.
Sentong nung Nagaland State Pharmacy Council tir Dziesevotuo-ia pharmacist tem dang public health atema tebilemtsü abentsü ayongzük.
Pharmacist temi public health care system nung tongti shilem agitsüla aser ibaji mozü tasentem junga mita reprangba mapa inyaktsüla, ta paisa ashi.
Pharmacist temi tajungba kümnür saka India nung pharmacist studies ya diploma courses ama dang agir. Anungji sorkari course temabai ajungkettsü nüngdak, ta Dziesevotuo-isa metetdaktsü.
Sentong nung mendenji Drug Inspector Ethungbemo Ezung liasü aser Ekletos Baptist Church Kohima pastor Peter-i temoatsü meshia sarasadem.
Iba anogomung nung Continuing Pharmacy Education shisatokden ka liasü aser iba nung Dziesevoto-i “Pharmacy Practice Regulation 2015” aser Lutovi Pucho-i “Introduction to Pharmacovigilance programmes” onüktem jembi.