BJP-i aibelenba shia parnoki kü tenüng kakteter: Robert Vadra

New Delhi, Rongjui/Sept. 26 (Agencies): Tanü Congress lenir, Sonia Gandhi’er jala kinüngbu, Robert Vadra-i, Dassault Aviation-i par medemer ka nem rafale deal contract magutsüba ajanga UPA-i iba contract agien ta BJP-i aitsübaji tai, ta ashi.
Paisa, BJP-i aibelenba shia pa tenüng kakteter, ta aitsü.
Facebook post ka ajanga Congress Tir Rahul Gandhi teno, Priyanka Gandhi kinüngbu Vadra-i, “Tamasabo ni süngmanga dang liasü, ajisüaka item ajunga ya asayamenu ka kümogo. BJP-i aibelenba shia kü tenüng kakteter- item rongnung ‘rupee’ jenjang ajema akumba, totzü jenjang atuba aser tang tesüsa Rafale deal nung parnoki linük yoka achiba densema lir. Agency ajak parnok tashi kübok lir. Tan aliba sorkarji parnoki tajungba meteta lir aser tesüiba küm pezü tashi yimtenren nung ajemdaker BJP-i ni anema nokdaker. Parnoki teku tematsük inchi 56 alisang (Modi) tasü itdakja linük nem Rafale indang metetdaktsütsüla,” ta ashi.
Rafale deal ken o nung Congress-i aitsüba maremteti BJP-i, Dassault Aviation-i Vadra’er medemer Sanjay Bhandari indang firm nem contract magutsüba agi UPA sorkari iba contract agien, ta aitsü. BJP-isa, Sanjay atema Rafale contract yanglutsütsü atema Vadra-i London nung flat ka den Zurich-i aotsü atema Bhandari ket nungi air tickets angu, ta aija liasü.