Bodoland University nung anogo tenetbuba lungkak aiter

Kokrajhar, Rongjui (September) 26 (Agencies): Mongulbarnü Kokrajhar Deputy Commissioner Niranjan Baruah; Superintendent of Police Rajen Singh aser ADC Baskar Das nungertemi Bodoland University semdang.
September 20, 2018 nungi Bodoland University nung mapang telatet makai lungkak aiter.
DC aser SP nati Bodoland Students Union (BSU) lennirtem den ajurutepa olemtep aser high-level inquiry committee kati September 28 nungi 30 tashi Bodoland University semdangtsü ta osang metetdaktsü.
Bodoland University nung BSU-i ayongba lungkak aitba sentong ya tanü agi anogo tenetbuba agiogo. Parnoki tang teinyakdak VC Prof Hemanta Kr Baruah melena acting Vice Chancellor ka shimtsü atema takhangba agütsür.
BSU lenirtem, züngsemtem aser school college o public meyirjang aikati Bodoland University nung Vice Chancellor tasen shimtsü takhangba agüja lungkak aitba nung shilem agidar.
Tesüiba anogo trok tashi University nung mapa kecha meinyakteti arur.
BSU tir Swgwmsar Basumatary-i osangbener den jembidang ashiba agi, “anogo tenetnü lungkak aitaka State Chief Minister Sarbananda Sonowal mesüra Governor aser University nung Chancellor Prof Jagdish Mukhi nungi osang kecha mali.”
“Kechiba inquiry telok ka campus-i arutsü mapang agir’ar onoki mangateter. Assam sorkar aser university Chancellor nati iba lungkak aitba khuret bentettsüla” ta paisa ashi.
Tang teinyakdak Vice Chancellor-i küm pungu tashi inyaka arudang University atema kecha meinyaktsü ta BSU tirisa shisem.
Maneni, Bodoland University Teachers’ Association (BUTA) nung tir Dr Jyotiraj Pathak aser tezülur Rustom Barhma nati state sorkar dang aser Chancellor dang tekaratiba nung tebang aitsü aser telemtetba ka agitsü atema mepishia metetdaktsü.