Kohima DC-i senden ayonga amen

Kohima, Rongjui/September 26 (TYO): State stesem ajakalen lokti nübodok mapa inyaktsü aliba dak sendakba nung Kohima Deputy Commissioner, Rajesh Soundararajan IAS-i tanü DC’s Conference Hall nung coordination senden ka ayongzüka menogo.
Iba senden nung Rural Development Adviser, Dr. Nicky Kire; Vety & AH Adviser, R. Khing, tongti ketdangsertem aser melunget telok balala nungi züngsemtem aden.
DC-i, Rongjui/Sept 27 nungi Mongputeni/Oct 2 tashi lokti nübodok mapa inyaktsü aliba atema mapalem aser asalentong atema iba senden ya ayong, ta metetdaktsü.
Iba dak sendakba nung Adviser Dr. Nicky Kire-i, Swatchh Bharat Day aser Mahatma Gandhi sor küm 150 ajungba anogomong (2nd Oct) den taruba Hornbill Festival dak sendakba nung Chief Minister-i state tesem ajungalen nübodok mapa junga inyakdaktsüner, ta metetdaktsü.
Paisa departments aser nija ajak dang iba khuret longjemer aentsü aser asen yimti merüka ayutsü atema tajungtiba agi inyakdaktsüner, ta mepsihia metetdaktsü.
Paisa mapa lemzükja aliba departments aser nijatem dang yimti tebor ajungtsü atema süngdong atemtsü aser lenmang tiplen jana indokba merüktettsü metetdaktsü. DC-isa, nübodok mapaji Rongjui/September 29 nü jila nung wards/colonies nungi tenzüka Administrative Headquarters, Sub-Divisions aser yiomtsüngtem inung inyaktsü ta metetdaktsü.
Paisa, iba maparen ya talisa kilentzü aodak aser ayongno merüktetba mapa asütsü, ta ashi.
DC-i Sector Magistrates danga colony Chairman den senteper nübodok mapa inyaktsü tongti tesemtem jangjatsü metetdaktsüba den külemi tim depts dang jana bendena KMC dumping site nung indoktsü atema nüngdakba inyaktsü metetdaktsü.
DC-i melungtet teloktem danga Council mesüra Panchayat den angatettepa inyaktsü metetdaktsü.
Nübodok mapaji Rongjui/September 29, 2018 anepdang 7:00 ako nungi wards/colonies aser shimteta aliba tesem ajak nung inyaktsü.