GPRN-i Sumi telok balala den senden amen

Dimapur, Rongjui (September) 26 (TYO): September 26, 2018 nü Hotel Acacia, Dimapur nung Government of the People’s Republic of Nagalim-i Eastern Sumi Hoho, Gaon Buras aser Dimapur Eastern Sumi Union, Kohima Eastern Sumi Union o Kiphire Tuensang Students’ Union dena tongti teloktem den Consultative Meeting ka amen.
Kilo Kilonser Hukavi Yepthomi aser Military Cross, Longvibu, Naga Army Anthony Shimray nati anir GPRN teshimtet telok senden nung aden, ta Ministry of Information and Publicity sangdong ka nung ashi.
Naga yimten tebilemtsü dak sendakba onüktem lemsateptsü aser angatettsü atema tanü sendenji ayonga amen.
Eastern Sumi Hoho lennirtemi parnok GPRN den dena lir aser Naga nunger atema teti noktaktsü ta ashir. Kasa mapang nung ESH-isa parnok United Sangtam Region den pilatsü aser GPRN kübok Eastern Sumi Region balaka tentettsü atema mepishi, ta MIP-i metetdaktsü.
Naga lennirtem aser India sorkar tsüngda Framework Agreement agiba sülen Kilo Kilonser aser Longvibu nati anir GPRN-i Naga nunger den ajurutepa sendentem menyonga arur. Iba ajanga Naga tribal Hoho aikati Indo-Naga Peace Process den yariteper aser tajungba metetogo, ta MIP-isa sangdong nung shia lir.
GPRN lennirtemi senden nung adenertem dang ‘Naga nunger politics ajak ya asenoki Khrista dak tamang ayuba nung ajemdaker lir aser Framework Agreement ajanga Naga nunger anitettsü’ ta ashi.
Parnokisa Naga nunger dang telemsa agientsü aser asen linük alizüng külemi tongtettsü atema longjemtsü ayongzük.
Indo-Naga ken o bentetbaji Naga nunger atema dang masü saka India atema tajangzük asütsü, ta MIP sangdong nungsa shia lir.