Water Resources Department nung Biometric attendance system tenzük

Dimapur, Rongjui (September) 26 (TYO): September 26, 2018 nü Water Resources Department Advisor, Namri Nchang-i Directorate of Water Resources nung AADHAAR based Biometric attendance system tenzüktsüogo.
March 8, 2018 nü Cabinet-i Department ajak nung mapa inyakertem atema Aadhaar amshia Biometric Attendance System inyakyim tenzüktsü atema telemtetba agia tetuyuba agütsü.
Iba tetuyuba nung ajemdaker Water Resources Department-i mapa inyakertem attendance, leave record aser department inyaksangshi tajungba akümtsü atema BAS inyakyim tenzük.
Sorkari office ajak nung biometric system tenzüktsü sentong atongba atema kanga pelar. Iba ajanga mapa inyakertem indang attendance shitak bendentettsü, anungji staff ajaki amalitepa iba mapa inyaktsü ayongzüker, ta Advisor Namri Nchang-i tanü o jembidang ashi.
Water Resources Department Chief Engineer, Tsuktinungsang-i anküp tepela o jembidang, tapak tejenba shibangogo aser temelenshi bener aruba mapa nung tapak tasen ka tenzükogo, ta ashi.
Paisa staff dang tajungtiba nung inyaktsü aser Biometric Attendance System ajanga APAR reprangtsü ta ashi.
Department of Information Technology & Communication aser Syscom Technology-i Water Resources Department nung Biometric Attendance System tenzüktsü yaritepba atema Chief Engineer-isa pelaba metetdaktsü.
Sentong nung mendenji SDO & Nodal Officer for Biometric Attendance WRD Er. Wapangnaro Imchen liasü aser Commissioner & Secretary, O.T. Chingmak, IAS aden.