Supreme Court-i Aadhaar atema obendang agütsüogo

New Delhi, Rongjui (September) 26 (Agencies): Bodbarnü Supreme Court-i Aadhaar ya temzüngi melaba mapa ka lir saka talenba kar lir ta obendangtsüogo.
Chief Justice Dipak Misra-i anir züngsem pungu agi akümba Constitution Bench-i ashiba agi, loktiliba nung teküpok jenjang nung alirtem ajangzükdaktsütsü atema Aadhaar ajanga teyari agütsür.
Ajisüaka, unique ID maliba ajanga nisung ka nem pa tangutsü tim temeten magütsüi tenokdangba magütsütsüla, ta Bench-isa ashi.
Mapang talangka Aadhaar indang tashi atema atsütepa aruba sülen Constitution Bench-i Aadhaar ya ozüngi melar saka services ajak nung amshitsüsa ta telatetba kecha mali, ta tanü obendang agütsü.
Aadhaar menüngdakba services kar:
Bank Accounts: Supreme Court-i tanü obendang agütsüba nung “Aadhaar den Bank account sendakteptsü nüngdak madoker.”
Mobile Numbers: Taoba mapang tetuyuba agütsüba nung SIM card tasen ka agizüktsü atema aser tang tamshidak mobile number atema Aadhaar sendakteptsüla ta ashi. Ajisüaka, tanü SC-i mobile numbers Aadhaar den sendakteptsü nüngdak madoker ta obendang agütsü.
Schools: “Aadhaar maliba atema kaketshir shinga Education mangutsüsa tenokdangba magütsütsüla” ta Supreme Court-isa metetdaktsü. Iba den külemi school tem nung kaketshir shia nem Aadhaar mali yonga social schemes nungi teyari agütsütsüla ta parnokisa shisem.
Exams: Tang nungi Central Board of Secondary Education aser NEET exams atema Aadhaar menüngdaktsü ta SC-isa ashi.
Private Bodies: School temi kechi südir süaka Aadhaar alitsüla ta tetuyuba magütsütsüla ta SC-isa ashi.
Aadhaar nüngdakba services:
# PAN (Permanent Account Number) den Aadhaar sendakteptsüla.
# Sorkar indang welfare schemes aser subsidies kübok teyari angutsü atema Aadhaar nüngdaktsüsa.
# Income tax (I-T) returns agütsüba mapang Aadhaar number kechi südir süaka agütsütsüla.