S-300 agütsü tenzükogo: FM Lavrov

Moscow, Rongjui/September 29 (Agencies): Russia-i S-300 surface-to-air missile systems Syrian forces nem agütsü tenzükogo, ta Russian Foreign Minister Sergei Lavrov-i ashi.
Russia nunger indang reconnaissance aircraft Il-20, Israel missile kati khazüka yokba sülen telemtetba agir S-300 surface-to-air missile systems agütsü tenzükogo, ta Rogonü Lavrov United Nations (UN) news conference ka nung ashi.
Israel-i northwestern Syria amakba mapang nung Il-20 dak akha anungji parnok dak atongtsü langa lir, ta Moscow-i ashi.
Israeli military-i ashiba agi, Syria nungeri parnok tayimtsü khazüka yoktsü merangba mapang nung iba lendong atalok.
“Iba tatalokba sülen Tir Putin-i ashiba ama, onoki jenjang agitsü aliba ya ozü nüburtem kümzüka ayutsü atema lir,” ta Lavrov-i ashi.
United States aser Israel-i iba telemtetba agiba anema nokdakba mapang ka nung Russia-i iba jenjang agiogo.
Moscow-i iba telemtetba agiba ya aibelen tuluka lir ta US National Security Advisor John Bolton-i shiogo.
“Syria sorkar nem S-300s agütsüba ajanga timtem adoktsü. Osangtem shidak süra Russia-i iba jenjang agitsü aliba ya tanaben asadangshitsü onoki imlar,” ta pai Tentonü ashi.
Phone ajanga Putin dang Israeli Prime Minister Benjamin Netanyahu-i, khuret shidak mangatetba nisungtem ket nung advanced weapons system amoktsüba ajanga iba tesem nung lendong tali adokdaktsütsü, ta Israeli prime minister office sangdong ka ajanga metetdaktsü.
Syrian Foreign Minister Walid Muallem-i Rogonü ashiba agi, iba missile system ajanga Israel nunger raraba tayimtsütem takok ngua nokdangtsü imlar.