Basra nung US consulate shibang

Basra, Rongjui/September 29 (Agencies): United States-i, Iraqi yimti Basra nung parnok indang consulate shibangba aser deplomate tem iba yimti nungi aninba sangdongogo. Ketdangsertemi ashiba agi, parnok amokmerenba tali akümba aser Iran aser Iran-i nungita yariba sepaitemi rocket akhaba tali akümba sülen iba telemtetba agi.
Washington-i economic sanctions tali benokba sülen mangatettep adoka aliba nung iba telemtetba ajanga US aser Iran na tsüngda tesendaktep tamajungba kümdaktsü.
US Secretary of State Mike Pompeo-i, US diplomatic facilities aser par nüburtem makra aji Iran dak atongtsü, ta ashi.
Tawa rocket ajanga amakba ya Basra nung US consulate amaktsü merangba liasü, ta Pompeo-i ashiba sülen iba telemtetba ya agi.
Ajisüaka US ketdangsertemi ashiba agi, rocket temi consulate dak mekongshi, koba Basra airport compound nung amenoka lir.
“US makra onoki telangzüba agütsütsü jangja jangja metetdaktsüogo aser Iran-i iba ya angatettsüla,” ta Pompeo-i ashi.
US State Department sangdong ka ajanga ashiba agi, consulate shibangtsü asoshi tetuyuba agütsüogo aser iba tetezü staff temi iba tesem toktsütsü. Personnel kar diplomatic compound nung maneni lia atatsü akok saka consultant ya khen atemabo shibanga atatsü ta amanger.
Iraq foreign ministry sangdong ka ajanga ashiba agi, America-i Basra nungi parnok staff tem anintsü asoshi telemtetba agiba ya tesasatsüka lir.