Indonesia menoknok, tsunami lendong nung nisung 384 süogo

Palu, Rongjui/September 29 (Agencies): Indonesia kübok Sulawesi asetkong nung menoknok anokba ajanga tsunami adokdaktsüba sülen tang tashi nung nisung 400 shi süogo, ta ketdangsertemi Küptoknü metetdaktsü. Lendong atalokba sülen mozükidang yirur alirtem mesümei kümogo aser tekümzükertem iba tesem adongotsü asoshi merangtepdar, ta kasa sangdong ajanga metetdaktsü.
National disaster agency sangdong ka ajanga ashiba agi, tang tashi nung nisung 384 asüba jangjaogo aser parnok ajak ya Palu yimti nung asüba lir aser maneni iba dang nungi nisung timba sür alitsü ta temulung melemi bilemba metetdaktsüogo.
Iba yimti nung nisung 350,000 shi alir aser tzüküm anasa tasümangtem tesadang nembanger aliba ngutetogo. Kasa mapang nung Rogonü aonung tzüküm nung benjung ka akatsü aliba atema renemshia alir parnok noklang aika kolen aliar mejangja, ta disaster agency-isa metetdaktsü.
Mozükitem nung yirur alirtem müsemi kümogo aser nisung aika kima nung dang temang anepaludar aser lendong nungi jenbor alirtemi tasümangtem bushiba nung teyari agütsüdar.
Menoknok tesashi ka anokba sülen iba ajanga ki aika raksatsüba den tsunami tulu adokdaktsüba ajanga nüburtem tenem bushia jenshiogo aser Palu yimti tamang nung lir.
Taküm küm Chiteni/July aser Luroi/Aug nunga Indonesia kübok Lombok asetkong nung menoknok anoka nisung aika tepsetogo.
Indonesia tir Joko Widodo-i ashiba agi, lendong ataloker aliba tesemi search-and-rescue teams nem teyari agütsütsü atema military yokogo.
Taoba mapang nung search and rescue agency tekolakba Muhammad Syaugi-i AFP dang local staff temi tasümang aika ngutetogo, ta metetdaktsü.
Agency sangdong ajangasa ashiba agi, ki aser local hotel tem aika raksatsüogo aser yimti nung apu tongtibangtiba chirepogo.
Maneni yimti nung tongtibangtiba lenmang kanga mejungi raksaogo aser anentsü agi anenbanger lir, ta disaster agency ajangasa metetdaktsü.