Vitamin D aser tanur temang tozük tajemba akümba na sendaktepa lir

Bushisüngdang ka ajanga ashiba agi, Vitamin D supplements ajanga tanur temang tozük tali (obese) alirtem tajemba kümdaktsütsü akok.
Iba ajanga maneni tarutsü nung temulungjang tashidak aser metabolic disease nunger amal agi kangshitsü aliba nungi kümzüktsü.
Bushisüngdang ajanga ngutetba agi, vitamin D supplementation ajanga tanur asüdang temang tozük tali kümdaktsüba tebilemtsütem bentettsütsü aser iba ajanga tain akümdang temulungjang tashidak amala temang nung tashidak tulu adoktsü aliba nungi nisung ka jenboa doktsütsü.
Bushisüngdangertemi tanur shirnok nem vitamin D supplements ita 12 agütsü, parnok temang tozük aser temang nung temo tajemba akümba den cholesterol levels tajungba akümba ngutetogo.
“Item tengutetba tem ajanga tongmelang agi vitamin D supplementation agütsüba ajanga overweight aser obese tanurtem tarutsü nung temulungjang tashidak aser metabolic complications adoktsü nungi jenboa doktsür,” ta University of Athens Medical School nungi iba bushisüngdang lenir Professor Evangelia Charmandari-i ashi.
Iba bushisüngdang ya European Society for Paediatric Endocrinology 57buba senden nung sangdonga liasü.
Vitamin D aketba chiyongtsütem kar:
Ango (Salmon, Herring aser Sardines), Cod Liver Oil, Konger, naring-tzü, mamatzü, entsü tokosen, nashi temesen, cheese, kolar, azüngken nunger alama alitsü.
Source : Internet