Madhya Pradesh aser Rajasthan na nung Congress den melokteptsü: Mayawati

New Delhi, Mongputeni/October 03 (Agencies): Tanü Bahujan Samaj Party (BSP) tongti lenir, Mayawati-i, Madhya Pradesh aser Rajasthan assembly election atema lar party-i Congress den melokteptsü, ta sangdongogo.
Ajisüaka 2019 küm Lok Sabha election nungbo Centre nung BJP tsükdaktsütsü atema BSP-i tanga opposition party tem den longjemtsüa akok, ta liasa ashi.
Tanü nikongdang osangbenertem den jembidang Mayawati-i, “Onoki Madhya Pradesh aser Rajasthan election nung Congress den melokteptsü,” ta metetdaktsü.
“Rahul Gandhi aser Sonia Gandhi napronglai state aser Lok Sabha election nung BSP aser Congress party na loktepner. Parnoki Congress-BSP loktepnübaji tim dang, ajisüaka lenir kari nokdanger,” ta lai ashi.
Mayawati-isa Congress aija, Congress-i Madhya Pradesh nung lai aginüba magizükba ajanga Guijarat ama state aika nung küm aika Congress-i takok mangur, ta ashi.
“Congress-i junga lokteptsü melunga mali, parnok renema mali ama reprangteter. Congress-i BJP tamakok ngudaktsüner asü, ta ni asüngdanger. Parnok tangatetba ajanga onoki tangar den külemi Karnataka aser Chhattisgarh nati ao,” ta taoba mapang Uttar Pradesh chief minister, Mayawati-i ashi.
Ita ishika tejaklen Bengaluru nung Karnataka Chief Minister tenangzükba agiba sentong nung Mayawati aser Sonia na densema opposition lenir aika sabang ka nung longjema liasü, aser ibaji ajanga taruba election aika nung Congress aser BSP na longjemtsüa akok ta bilema liasü.
Taoba ita Mayawati-i Congress toktsüsang, Ajit Jogi den Chhattisgarh nung lokteptsü sangdonga liasü. BSP-i Congress dang assembly menden 230 aliba Madhya Pradesh nung menden 50 meshi saka Congress-i magizük.
Mayawati-i Madhya Pradesh assembly election atema candidate 22 bo sangdongogo.
Congress-i kümsük ana tashi Madhya Pradesh nung tamakok angu, aser taruba election nungbo parnok kijai takok nguner. Tang state nung BJP menden 160 aser Congress bo menden 25 dang lir.
BSP lenirisa, Congress nükjidongji BJP tamakok ngudaktsütsü atema masü saka tanga party tem yirutsütsü atema lir, ta ashi.