Ram Madhav-i Mizoram nung ochimashi agientsü nangzüker

Aizawl, Mogputeni (October) 3 (Agencies): Mizoram chief minister Lal Thanhawla-i ochimashi mapa inyaker aser BJP nem sorkar akümtsü tashi agütsüra, Mizoram nung ochimashi agientsü ta Bharatiya Janata Party national general secretary Ram Madhav-i ashi.
Lanurtem den sensaksemdang Ram Madhav-i ashiba agi, Lal Thanhawla-i ochimashi mapa kanga inyaker aser pa tenui parnok mulungba ama sorkar sen tangalen amshir.
“Lal Thanhawla-i ochimashi agientsü ta nangzük, saka atangji nungbo pai ochimashi inyaker. Mizoram nung yimtsüng tia nung aliba tesemtem dang masü saka jilatem nunga tang nüngdakbatem peria mali” ta Madhav-isa ashi.
Centre nungi sen agütsüka Lal Thanhawla’er sorkari Mizoram nung alirtem atema kecha meinyaktsür, ta paisa metetdaktsü.
“Ni Indo-Myanmar arrtsü anasa aliba Champhai jilai ao. Iba tesem ya kangasa topur tajung aser Darjeeling of the Northeast ta ajatsüsa lir. Saka sorkar ketdangsübaren majungba ajanga gari lenmang tia kanga mejungi lir. Tanga state tem nungbo lenmang tsüngda ongkenten lir saka Mizoram nungbo ongkentem nungang lenmang lir” ta Madhav-isa state sorkar dak tai tonglokja jembi.
Act East policy ya mapa küma tenzükba sülen Mizoram ya shishilembadak tongti tesem ka akümtsü. Mizoram ya Myanmar aser Bangladesh tsüngda lir aser iba ajanga Northeast nung shishilembadak tongti ka akümtsü. Onok nem sorkar akümtsü tashi agütsüra, Mizoram nung dry port ka yanglutsü aser Chittagong den direct trade link asütsü, ta BJP general secretary-isa ashi.