Asenok khuret

Tanü Naga lima tia ya jungjunga anguoka ia reprangdangra kanga tebenja tia ka nung angutsü. Nagaland state adena orr aliba Naga kintemji khen yutsür, Nagaland kübok aliba Naga kintem yimten aser loktiliba tia reprangdangra, molungmelemtep aser meputep agi sünger, Naga kintem ajak külemi longjemer aoba lokti tentet kata mali kümogo. Iba denji ano Naga nunger linük nüchiso bushirtem rongnunga meputep tali tali adoka telok telemsa teimba teimba küma aoba angur. Iba ama tia ka nung küm pongo shia Nagaland nung India temzüng kübok election agir aser election agi shia nübortem rongnung meputep aser tsükchitep tali adenba dang masü saka election mapang senotsü onsara endokba ajanga Nagaland rajang akümba asenoki reprangtetter. Item tensa tia indangji kodang asenoki jungjunga bilemdangdir, alima nung kin ka benjadi asünung, iba tashiang benjatettsü südi ta asenokia angatettsü. Atangji, Naga nunger shingaia melongjemi aser meputepi melinür saka melongjemtetter aser putepa melitetter. Ibayongji, tanü tashi Naga yimten tebilemtsü ken o-a India den tatembang küma melemtetteter. Naga yimten  ken o jembia jembia Naga nunger yimten nüchiso bushir telok balala aika kümadoknungji, Naga nunger asoshi dang masü saka India government asoshia temangmangtsü mapa tuluka kümadokogo. Joko, Naga nungertem rongnung telemsa onsara adoka adoknungji, Naga nunger shiai pei ajungtsü aser pei agitsü bilemba dak alaka Naga nunger arok ajungtsü asoshi bilemdanger mali kümogo. Iba ama mapang ka nung Dimapur nung Aor pensioner-temi Naga nunger arok tarutsü jenjang tajung ka asoshi shisadangtsü atema yimten, lokti aser arogo nung lenirtem aser maparen tapu balala nung khuret abenertem ayongdena sentong ka akatsü apitetba ya Naga lima asoshi teimla agütsüba mapa ka asütsü. Tang ya Naga nunger tia aser jenjang ya reprangdangra alima ka nung kiburtemi alartem o alartem na rongnung telemsa adokdaktsür raratepdaktsür amai lir. Alartem asoshibo kiburi khen shi aser ango den chiyongdaktsüji mesüra kenü mapa meiyaki kazüdaktsübaji mesüra kiburi khen o tanük tajung jembibajia tuluka, nüchiso menguaka angu amai bilema pei adianu taküma mapayui pei kibur peladaktsütsü asoshi inyaktsü. Tanü item alartem jenjang denji kasasa asenok lir. Asenok alar aser asenok kiburtemji Delhi nung oa alirtem  asütsüa akok mesüra sen aser yimten tashi akartem asütsüa akok. Asenoki yimten tashi tilaka ngunü dang aser senotsü ajangzüknü dang asenoki asen lima, asen nübortem aser asen tarutsü mapayur. Asenoki mapang tatsük asoshi asüyonga yimsüsür kümra ojang mesüra takar kümra ojang ta ser alima aser nübortem memeimi inyakba ajanga asenok jenjang ajunger masü saka asenoki asen aser asenok chirnurtem tarutsü jenjang raksatsür ta angatettsüla. Asenoki Naga nunger yimjung aser telongjem indang jembir saka asenang magii takoksa arema Naga nunger telongjem aser yimjung indang inyaker mali kümogo. Asenok ya shitakba nungbo yimjung aser telongjem bushir masü saka rongsen bushirtem kümogo. Ibayongji, Naga nunger telongjem raksaa oaka asenoki apayua mebilemer aser Naga nunger yimjung aser telongjem asoshi lenisüba magütsütetter. Tanü asenoki shisadangtsüba mapatemji itemji asütsü. Itemji tanga masü saka asenoki asenok kija ajangzükerbo ojang ta bilemba shisatsü tila ajanga adokba timtemtem asütsü. Atangji, alima nung rongsen bushitsü nüngdak saka rongsenji asen kija atema masü saka arok agitsü aser ajungtsü atema bushitsüla. Iba tangatetba jagi Aor tama arutsü kanga nüngdaka kümogo. Shitakba nung tanü Naga nunger asoshi nüngdakbaji Naga nunger asoshi yimjung aser telongjem atema lenisüba agütsütetba nübo nüngdaker. Itemji asenok asütsüla. Akhi mapanga, Naga nunger teimla samaer tetugulen mangu mangmangtepa alidang, Aortemi Naga nunger lenirtem ayongdena shisalemsatepba ajanga Naga nunger nem teimla aser anisüngzük agütsüba asenoki meteta lir. Iba kasa lenisübaji tanü asenoki Naga nunger nem agütsütettsüla. Ashiba ama, tanü Naga nunger yamai melongjemteti mangmangtepa aliba mapang, Aortem tezü nungi repranger mesüi tongti shilem agia Naga nungertem nem teimla aser telongjem bener arutsür asütsüsa shisadangtsü aser mapa küma inyaktsü kanga nüngdaka kümogo.