Russia-i Syria nem S-300 missile system agütsüogo

Mongputeni/Oct. 03, 2018 (Agencies): Taoba ita Russia nunger tayimtsü ka khazüka yokba sülen mitkar tsütsü asendenshitsü mechi Russia-i Syria nem S-300 surface-to-air missile system ka agütsüogo.
Launch platform pezü densema S-300 system agütsüba maparen tembangogo, ta Russia Defence Minister Sergi Shoigu-i Sangtennü par linük security council senden nung metetdaktsü.
Iba air defence system tasenba amshitsü asoshi Syria mitkar nem training agütsütsü ita asem agitsü aser Russia o Syria air defence assets automated system ka kümdaktsütsü asoshi Mongputeni/October 20 nung renemtsü, ta Shoigu-i ashi.
“Tangbo asenoki zone anasatiba agi kilometer 50 aser zone talangtiba agi kilometer 200 azüoker, koba nung Syria nunger litsü nung lendong agüja aru,” ta Shoigu-isa ashi.
Aibelena Syria nunger missile ajanga Russia indang Il-20 reconnaissance aircraft khazüka yoka Russia nunger sepai 15 asüba sülen iba defence system tasenba ya agütsütsü telemtetba agi.
Israel indang F-16 jet temi northwestern Syria nung amakdang telok ana tsüngta khatepba mapang Il-20 tayimtsü nung khashi aser iba tai ya Israel dak tongoktsütsü langa lir, ta Moscow-i ashir saka Syria air defence-i tebilemdangba melie akhaba ajanga iba lendong ya ajuru, ta Israel sepaitemi ashir.
Russia-i Syria nem raraba oset agütsüba ya tebilemtsü tulu lir, ta United States-ibo metetdaktsüogo.