Iran nem US-i tenokdangba agüja aliba kar agientsüla: ICJ

The Hague, Mongputeni/Oct. 03 (Agencies): United Nations indang tematiba court ajanga United States dang humanitarian goods aser civil aviation dak sendakba tenokdangba agüja alibatem agientsü totuyuba agütsü, koba Tehran-i pelashishia agizük.
“Humanitarian ground nung ajemdaker Iran-i nüburtemi nüngdakba osettsüset bener otettsü mechi tenokdangba kar agientsüla,” ta International Court of Justice (ICJ) ajanga Rasemnü obendang agütsü.
International Court of Justice ajanga obendang agütsüba ya tatembang lir, saka item obendang mapa küma inyaktsü asoshi parnok dak tashi mali.
“Iba telemtetba ajanga Islamic Republic ya shidak aser US-i aser nüburtem anema tenokdangba agütsüba ya ozüng alema aser taochi mali ta maneni kuli sayur,” ta Iran indang foreign ministry ajanga sangdong ka nung ashi.
Tehran-i ICJ mesüra World Court dang Iran indang ken o ajunga jembiba mapang tenokdangba kar khen asoshi agiena atang ta Washington nem totuyuba agüjang, ta ajungshia aru, kechiaser iba amala ken o ya küm aika amshir.
ICJ ajanga telemtetba agiba ya Iran nungertemi aginüba shidakbo masü aser US-i aginüba masü, ta osangbener kati ashi.
Iran-ibo tenokdangba ajunga agiendaktsünüa liasü, ta paisa ashi.
Monupii/May nungi tenzüka US Tir Donald Trump-i aniba administration ajanga tenokdangba agüja aliba ya 1955 Treaty of Amity nung aibelener, ta Tehran-i aitsür.
Saka Iran-i mepeshiba ya court mashi lenmang nung amshitsü merangba lir, ta Washington-i ashir. Iran nung 1979 Islamic Revolution marudang sign süa aliba 1955 Treaty of Amity nung shia aliba ama Iran-i aiben meinyak aser iba ajanga tanü tashi linük ana tsüngta tesendaktep mejungi lia arur.
1955 treaty nung, mangatetep ken o angatetteptsü asoshi court amshitsü shia mali, ta US State Department Legal Adviser, Jennifer Newstead-i taoba ita oral hearing mapang shia liasü.
Iran indang chichiba rarabangsen ya court indang litsü telungzük nung masü, saka 2015 küm Iran, US aser tashi tait linük pongu tsüngta tezüngzükep agiba nungi US atsüngintsü Tir Trump sentong aliba aoshi Iran tezüatangba ya lir, ta lai ashi.
Iba tezüngzüktep ajanga Tehran nem tenokdangba agüja aliba agienja nuclear sentong tanaben tenzükshi.
Saka Trump administration-i iba tezüngzüktep nungi Monupii/May nung atsüngina Tehran anema tenokdangba maneni agütsütsü sentong lir, ta sangdong.
US-i iba mera agiba ya United Kingdom, Russia, France, China, Germany aser European Union temi anema nokdak, kechiaser parnok teyari agia iba tezüngzüktep ya yanglua liasü.
US-i tenokdangba agütsüba ajanga bendanger company aika Iran nung shishilembaba anenadok, aser rongsenketsüng tashi mait kümdaktsü, iba inyakyim ya 1955 tezüngzüktep nung aibelenba lir, ta Iran-i ashir.
ICJ-i obendang agütsüba ya nuclear tezüngzüktep atema osang tajung ka lir, ta Qatar University nung Iran yimten yimli mongin aser researcher Luciano Zaccara-i ashi.
“Iba ajanga EU-i tezüngzüktep taküm alitsü mechi senotsü agütsüba inyakyim temelaba kümdaktsütsü,” ta pai ashi.
“Saka iba telemtetba ajanga Trump administration-i Iran atema yangluba sentongtem melenshitsü asü masüar ashitsü makok… parnoki US foreign policy nung ICJ indang litsü/tashi mezüngshitsü,” ta Zaccara-i ashi,
US-i tenokdangba agüja aliba majangi Iran den shishilembatsü asoshu EU-i sentong tasen ka yanglutsü taoba ita lemtet.
Linük aisü nungi taitsüba aruaka Washington-i tenokdangba tasentem ya agütsütsü temulungtetba tulu nung lir, aser iba maparen ya Yimpoksüi/November 4 nungi tenzüktsü.