M&R Vaccine

Tang asen lima nung tanur arishi ita 9 nungi arishi küm 15 tsüngdapur tanurtem nem Measles aser Rubella tashidak nokdangtsü atema vaccine (mozü) agutsü tenzükogo. Ajisüaka tawa social media nung olulu balala prokba ajanga tanur aikati iba vaccine agitsü arendakba osang angashir. Olulu rongnung kaji- “Measles aser Rubella vaccine agira tarutsü nung generation ka nungbo tanur khenyongi masotsü.” Mapang ka nungbo tanur khenyongi masotsüsa World Health Organization (WHO) aser sorkari sayangtetdi ma? Rubella vaccine ya 1969 küm nungi amshia arur. 2009 küm tashi nung linük 130-i immunization mapatong nung rubella adenba vaccines agutsüogo saka item linük nungji nütsüng marenba mesüra tanur masoba timtem maliasü. Dimapur nung school ka nungbo class 10 nung azünger tanur ajak bangjemer Measles aser Rubella vaccine magitsü jembiba osang angazükogo. Asenoki Measles aser Rubella tashidak ya junga angatetra tsüraburtemi tanur ajak ajungshia iba vaccine agidaktsütsü imlar. Measles tashidak ya tanurtem tepsetba tongti tashidak rongnung ka aser Rubella tashidak ya ajanga tanur asoba tsütsü timtem agutsür. Tashidak anaprong atema taneptsü mali ajisüaka Measles-Rubella vaccine agira item tashidak nokdangtettsü. Mashisa tetsü ka dak rubella tashidak lira aiben no menden nung aliba tanur magishir aser tasü asor. Ibayongji tanur junga agishitsü atema iba tashidak nokdangtsü atema Rubella vaccine agutsür. Tamalen Polio vaccine ajanga tanur asoba nokdangtsü ta olulu jembia liasü, ajisüaka ibaji olulu ka dang liasü aser tanübo tsürabur ajaki mapang shidak nung chirnur nem polio vaccine aguja arudar. Küm asem tejaklen World Health Organization (WHO)-i India ya polio-free ta sangdonga liasü aser maneni India-i 2020 küm tashi nungbo measles tashidak samatsütsü aser congenital rubella syndrome (CRS) azüoktsü nükjidong yur inyaker. WHO-i ashiba agi, rubella vaccine dose ka agiba ajanga tanur asotsü shilem 95 agi jenjang tajungba kümdaktsür. Ano külen Measles ya kanga bulua menatepba tashidak ka lir aser tanur jenti südaktsüba tongti tashidakj rongnung ka lir. 2015 küm alima nung measeles tashidak agi tanur 1,34,000 asür aser item rongnung India nung tanur 47,000 shi liasü. Measles vaccine tanabenbubaren agütsüba ajanga India nung measeles tashidak agi asürtem kanga ajem. 2010 küm India nung tanur 1,00,000 asü saka 2015 küm nungbo 47,000 dang asü. Rubella virus keta alir mashisa tetsür ka tanur abenba sülen tanur dak menaloktsü shilem 90% lir, aser no menden nung tanur dak iba tashidak menara ibaji ajanga tanur magishii asür mesüra tanur tenarong, tenük, temelungjang aser tekolok nung timtem keter asor. Alima nung küm shia tanur 1,10,000 dak congenital rubella syndrome (CRS) keter asor, aser iba nungjagi India nung 40,000 shi lir. Measles-rubella vaccination campaign ya shilem küma lemsar agir aser mezüngbuba shilem nung Karnataka, Tamil Nadu, Puducherry, Goa aser Lakshadweep nung agutsüogo aser tanüngba state tem ajakji ita 18 tsüngda ayimjema agutsütsü. WHO aser sorkari nübur takoksa ngudaktsütsü aser tanur million sa million tarutsü jenjang raksatsütsü atemabo meinyaktsü, anungji tsürabur ajaki arishi ita 9 nungi küm 15 tsüngdapur tanur ka danga mesendoki iba vaccine ajungshia agidaktsütsüla.