China Open: Osaka aser Wozniacki na quarter-final tongogo

Beijing, Mongputeni/October 04 (Agencies): Tawa US Open asayamung nung takok angula Japan tsür Naomi Osaka-i Yangtepnü/Thursday China Open asayamung round of 16 asaya nung takok ngua quarter-final tongtetogo.
Iba asaya nung Osaka-i seed 10 buba nung alila Germany tsür Julia Goerges madak 6-1, 6-2 agi koka liasü.
Arishi küm 20 tain Osaka,-i Rongjui/September US Open asayamung final nung America tsür Serena Williams koktetta mezüngbuba Grand Slam koktetogo.
Mezüng asaya tanga ka nung seed 8buba nung alila Osaka-i America tsür Danielle Collins madak 6-1, 6-0 agi takok ngua liasü.
Tanü Rogonü/Friday China tsür Zhang Shuai den Osaka quarter-final asayatsü jangjaogo.
Kasa asayamung tetsür kija round of 16 asaya tanga ka nung Demark tsür Caroline Wozniacki-i Estonia tsür Anett Kontaveit madak 7-5, 6-4 agi koka quarter-final tongtetogo.
Maneni, tetsür kija asaya tanga ka nung Germany tsür Angelique Kerber aser Czech republic tsür Karolina Pliskova na tia makai China tsür Shuai Zhang aser Qiang Wang den tsükadok.