Noklak nung Mini Hornbill sentong ayonga kaogo

Noklak nung Mini Hornbill cum Tsokum festival shibangba sentong nung Advisor, IPR, SCERT and Village Guards, Toshi Wungtung den tongti tesemdangertem aser sentong nung adenertemi tetsübutsü aketba ‘Kep Koi’ reprangba yangi angur. 

Noklak, Mongputeni/October 05, 2018 (TYO): Noklak nung anogo asem tashi ayonga agiba Mini Hornbill den repsema Kiamniunnagn nunger benjung Tsokum Festival sentong Mongputeni/Oct. 5, 2018 nikongtsütsü tembangogo.
Tatembangbuba sentong nung Kiamniunngan aser kidanger kintemi sobaliba dak sendakba kenten, tsüngsangba aser benjung den apet sentongtem achayanga agia liasü.
Hornbill benjung aser Tsokum festival tembangba sentong ya MLA aser Fisheries, Evaluation, Economics & Statistics Advisor, L.Khumo leniba nung agi aser MLA & Information & Public Relations, SCERT & Village Guards Advisor, Toshi Wungtung-i jembia liasü.
Sentong nung Toshi Wungtung-i o jembiba mapang, Nagaland state kübok tesem ajunga nung asadanga maliba tesemji Noklak tesem asütsü aser iba tesem nung alibatem metettsü asoshi meranga inyaktsü tayongzükba agütsü.
Noklak tesem ajunga ya timi asadangtet nungbo raliwalirtem atema tesem ka akümtsü ta, paisa ashi.
Toshi-i ashiba agi, nisungtemi meinprong magütsütsüsa Noklak tesem nung arem temelen aliba, tzü temürek, ayongtem, pei aatsü nungi tsünetetba süngolembatem aser sobaliba nung ka ita aliba tem ajitetta India aser bendanglen nungi raliwalirtem atsüa arutsü tashi lir.
Toshi-isa, pa lanuwa mapang tesem ka nungi tesem kati tetsüng pasa agi sema senzüba otsütem lemsatep.
Paisa ano sentong nung adenertem dang Chief Minister-i iba Mini Hornbill Cum Tsokum festival nung adentsü atema yongya ashiba saka state atema tongtibang mapatem nung mazüngba ajanga benjung nung medentetba indang metetdakja liasü.
Kasa sentong nung MLA & Advisor, DUDA, Bongkhao-i ashiba agi, Tsokum festival sentong nung nübur tsüngda agutsütepba aser lemsatepba ajanga telongjem, tatok agütsütepba aser tsükchitepbatem amadaktsür.