Kichutip Govt. Primary School Hon Jubilee mungogo

Mokokchung, Mongputeni/Oct. 4 (TYO): Mokokchung town kübok aliba Govt. Primary School Kichutip tenzüker küm tenem (50) ajungba Hon Jubilee sentong ka “honoring the past, Creating the future” omen nung ajemdaker parnok school kilem nung ayongzüka mungogo.
Tanü iba sentong nung tetushi tesemdanger Mokokchung Sr. SDEO, Imti Tzüdir-i jembidang, education ya lokti ka temelenshi bener arutsüba nung hadir tajungtiba ka lir, anungji, iba nükla nung education tajungtiba agütsütsü asoshi ajungshia liasü.
Tanurtem ya tarutsü nükla lir, parnok senso tajung aser jenjang yanglutsütsübaji khuret tulu lir aser tesayurtem ya kin yanglurtem aser kin ka tongtiret lir, anungji, tanurtem kinük pezüsü renloka anitettsü asoshi tesayuba agütsütsüla, ta paisa ayongzüka ashi.
Tanü alima ya tetoktepba agi süngogo, anungji, tesayurtemi tanurtemji tetoktepba nela nung sayutsüla, ta paisa inyakdaktsünüba ka ashi. “Nai kechi perokdir, aji dang arotsü”, anungji, iba tangatetba nung tesayurtemi sayutsüla, ta paisa shisem. Kilung ya mezüngbuba riju aser school ya tanabuba riju lir, anungji, tanur nem education agütsütsübaji tesayurtem kisüng khuret amai mebilemtsüla, iba shisatsüji intoktsüla. Education-ji class taktang nung sayuba kisüng jagi teperi makümer, anungji, education tajungtiba agütsütsü asoshi tesayurtem den tsürabur aser nüburtem ajaki shilem agitsüla, ta paisa ashi.
Tanü tesasatsüka tesayur aika tenüng agi dang aser kuli küptok tesayur mapa inyakba angur aser sorkar school kar nungbo school tanurtem dang nungi tesayur teimba lir, iba amaji masütsüsa iba school ya tajungtiba renloka bener aotsü asoshi paisa ajungshia liasü.
Paisa school tanurtem dang olen ka ashidang, Tsüngrem meteta pei tesayur aser tsürabur teti akhümtsübutsü asoshi ayongzüka liasü.
Tetushi tesemdangerisa GPS Kichutip pur jubilee nüngtem adokba nüngo kaket ka sayatsü. Sentong nung GPS Kichutip Teacher In-charge Nungchati Aier, Kichutip Ward Chairman Imtitoshi, WEC Chairman Tsükjemwati, Alumni Er. Tiameren (S.E Mon), mezüng Managing Board Committee züngsem K.Imti Ao, jubilee planning convener Sanglipong parnoki tepela o den tayongzükba o balala bener arua lemsatep.
Iba sentong nung taoba mapang iba school nung azüngertem, inyakertem, ward balala nungi ward yimden ketdangsürtem aser nüburtem aika arua longsotepa takok manung munga liasü.