Mkg nung kilentzü ayimdak lapokba atema pelar

Dimapur, Mongputeni (October) 5 (TYO): Mokokchung jila nung district administration, Mokokchung Municipal Council, PWD, UDO, SDRF aser tangartemi jila nung aser talisa Daily Market aser IM Road nung kilentzü ayimdak tangbanga aliba lapoka aoba mapa inyakba atema kanga pelar, ta Mokokchung Chamber Of Commerce & Industry (MCCI)-i metetdaktsü.
Mapa inyakba ajanga timtem ajurubatem shishilembartem aser dokan kiburtem den public-i aremtsü aser ketdangpurtem den yariteptsü mepishir, kechiyong iba mapa ya jila ajungtsü atema inyaker, ta MCCI mendenpurtemi metetdaktsü.
Mapang talangka lir kilentzü ayimdak tangbanga aliba lapoker aser ketdangsertem ket nung senotsü peria meliaka, iba mapa inyaker anungji senso ajaki tenüngsang agütsütsüla, ta parnokisa ashi.
Ketdangsertemi lokti tentet balala nung lennirtem den teka amteper sorkar dang nungi mesüra tangalen nungi sen bushitepa inyak asübo tajungba süla ta bilemer. Jila nung kilentzü ayimdak tajung aser timi ayutsübaji sentong jungjunga atonger inyaktsüba mapa ka lir, ta MCCI-i tebilemba ka lemsatep.