Child Care Homes tanurtemi Raj Bhavan semdang

October 5, 2018 nü Raj Bhavan Kohima nung Governor Acharya aser tangartemi Peren, Phek o Wokha nung aliba Child Care Homes nungi tanurtem den külemi agiba noksa ka angur.

Dimapur, Mongputeni (October) 5 (TYO): October 5, 2018 nü Peren, Phek aser Wokha district tem nung aliba Child Care Homes nung alirtemi Raj Bhavan nung sentong ka nung aden.
Nagaland Govenor PB Acharya, Raj Bhavan nung ketdangsertem aser staff den Governor-i jaokertem den tanurtemi shilem agi.
Tanü Governor Acharya-i tanurtem ayongzüka jembidang, alizüng tulu ayutsü aser züngzünga lesson bushitsü atema ashi.
Takok ya khen nung mangur saka jenjang ka khen ka ajangteta aoba sülen ang angur. Anungji tanurtemi shisaliok nung temulung agütsütsüla aser takok angutsü merangtsüla, ta paisa ashi.
Child Care Homes ketdangsürtem aser acha-ayangertem dang pelaba o ashidang Acharya-i “loktiliba tenzükba atema kanga pelar aser maneni tanurtem asoshi inyaka aotsü imlar” ta ashi.
Sentong nung Retd Chief Secretary, Banuo Z Jamir-ia tesentepertem den jembidang, Governor Acharya-i iba sentong ayongba aser tanurtem dang Raj Bhavan sayuba atema pelaba metetdaktsü.
“Tanur aika pei talidak toktsür moudangertem lir aser Raj Bhavan semdangtsüsa mapang angubaji parnoki kodanga mamatsü aser taküm nung takok tulu angutsü atema tangatetba ulushitsü,” ta laisa ashi.
Banuo-ia tanurtem dang ‘Nagaland nung tanur aikati Raj Bhavan semdangtsü maongka mangur, anungji nenoki iba mapang ya senti ta alangzüktsü merangang” ta ashi.
Laisa Child Care Institutions kiburtem aser yaritepertem dang pelaba metetdaktsü.
Sentong nung mendenji Kikasangla Aier liasü aser lai tesentepertem pela agizükdang “iba ama sentong ya Raj Bhavan Kohima indang putiotsü nung mezüngbuba lir aser Governor PB Acharya o pa kinungtsü Kavita Acharya nati acha-ayanga inyaker” ta ashi.
Tanü Peren, Phek aser Wokha nung aliba Child Care Institutions nungi tanurtemi ken aten aser Raj Bhavan indang kima nung saisapongtem kar asaya.
Governor-i Child Care Institutions nem carom board, board games, skipping ropes den tanga osettem agütsü.
Sentong nung Director PR & Media, Rotary Club of Mumbai Ghatkopar, Manpreet Singh aden aser paia Wokha District nungi Child Care Home ana adopt asütsü ta osang metetdaktsü.
Tanü agiba sentong nung Peren nungi tanur 11, Wokha nungi 14 aser Phek nungi 42-i shilem agi.