Aortemsa Tajungba

Aiben asenoki tajung inyaknüba ajak meinyaktetba agi tezüdanger asenoksasa asenok majungba jembir dang ashi, asenok Aortemi tajung inyakba indang bilemdangra Aortemsa tajungba ta shitettsüsa bilemtettsü. Nagaland nung alirtem ya teimbaka Aortemi anepalua Yisu temeim, kaketshisatsü, merükmejutsü sayuba purtem lir aser tanü tashi Aor kibong aikati kasa temeim sayua yaritepba angur. Tanüa Nagaland jenjang reprangdangra, Nagaland renloktsü asoshi bilema sentong tajung yanglurtem Aor aika lir. Aji oda, Aortem rongnungi yimjung yanglutsür tanishir tajung adoker aser Aortem dak ajak den putepa litettsüsa taremzük aser tangatetba shisatsü tajung lir. Naga nungersa süaka tang tashi tangar kintem rongnungbo nisung aika azüng aser zülu mashi lir saka Aortembo ajaki zülutetter aser züngtetter. Aortem rongnung zünga shia metetba tashitemetet jenjang asadangra, joko shisashirtem rongnung doctorate jenjang angur noklang dak tema kümogo aser alima nung Aotsür Aor maliba linük mali kümogo. Alima ajaklen Aor lir aser Aortemi inyakba mapa nung tangaria temulung asütsüsa inyaktetter. Nütsüngyongsük reprangdangra, Tsüngremi Ao kin kanga moatsüba angur. Tanü Aor lanurtem dak aketba sempet aser shisatsü reprangdangra tenükshitsüka aser jangratemtsüka angutsü. Item lanurtem dak peisasa mapa inyaktsü lenmang nguteta rongsen poktetdaktsütsü tashi aser temetetba lir. Parnok aika kentenmenü aser asaya nung tajung lir. Item lanurtemi asen lima asoshi tajung inyakner. Iba ama putu ka nung Aotsür Aortemi peisasa pei dak aliba sempet aser tashi meteta Nagaland ajungtsü asoshi inyak tenzük nungbo Nagaland ya manger sangwa nung jungadoktsü. Asenoki mangur aser memeteter asütsüa akok saka asenok dak tangar asoshi tajung inyaktsü tashi tuluka lir. Asenok dak tashmait aika liaka, tang tashi Naga nungertemi asenok dak tamang akar aser imlar. Aortemi dang Khristan yimsü agizük nung Naga nunger ajak Khristan akümba tashi aser temoatsüji atamata tashi masü. Aji oda, tangar kintem dang Ao oshi agidang zülutsü aser azüngtsü sayu nung melamelaa Ao oshi tashi angazüktetba tashiji tulu lir. Iba tashiji tanga asenok dak lir saka asenoki junga mamshiba agi mali ama samadaktsür. Iba sempet aser tashiji khen tasen küma meyushir, asenoki asen tsüraburtemi inyakba mapa tajung ajizüka inyaktsüba mapangji tang ya lir. Tanü asenok jangratema aliba ya asen tsüraburtemi pei ajung aser pei ajangzüktsü mebilemi tangar jungdaktsütsü aser tangar ajungkettsütsü asoshi bilema dang inyakba nungi aruba temoatsütem lir. Asen tsüraburtemi parnok takar aser tulur akümtsü memerang saka tangar tajung kümdaktsütsü asoshi dang taküm ajak bendanga agüja inyaka aru. Aji oda, taküm nung tepela, temoatsü aser jenjang tajung ya tangar asoshi tajung inyakba nungi arur ta asenoki angatetter. Iba tangatetba nung ano khen asentenshir Aor shisashirtem, laishirtem, arogo lenirtem, yimsüsürtem, government mapa nung inyakertem, retire ser alirtem, bushiness inyakertem  aser lanurtemi Nagaland ajungtsü asoshi pei temetetba aser pei takümji tenla ka ama agüja inyak tenzüktsü tanü tensa mapangi akanger ama kümogo. Aor Khristan akümba agi ajak Khristan akümba amaji, tanüa Aor kechi kümdir Naga nunger yamaji akümtsü. Naga nunger tsüngdang Aotsür Aortem asoshi tekümdangtsüji aji lir. Aotsür Aoribo tanga tamajung inyaktsübajibo yutsür metsüa mashi nung memetsütsüla ta asüba tangatetbaji asenok dak alitsüla. Asenokji sünüaka mesünüaka tesayur kümogo aser tesayuri koma sayudir yamaji tanurtem akümtsü. Naga nunger melongjemi lira Mokokchung nung Naga nunger ajak jatepa tajung ka jembitsü asenoki bilemdi. Naga nunger rongsenren nung tebok mesüngteti lira asenoki Naga nunger ajak mesütettsüsa rongsen lenmang bushia inyakdi. Naga nunger yimten tebilemtsü koktettsü asoshia asenoki maneni shisa tajung agüja yaridi. Naga nunger tanüla tsütsüa tashimait ooya lira tashi itshidaktsüdi. Asenok koma linür ta masü saka Naga nunger koma lidaktsüner ta asüba nung asenoki o nung aser mapa agi litetra, ano ajak asoshi Aorsa tajungba asütsü.