Election nung ajangzüktsü atema totzü jenjang alu: Congress

New Delhi, Mongputeni (October) 7 (Agencies): State tongtipang pungu nung assembly elections agitsü aliba dak rangloker Centre-i totzü jenjang ajema aküm, ta Narendra Modi-i aniba BJP sorkar anema Congress-i Deobarnü metetdaktsü.
Centre-i GST kübok petroleum products dendaktsütsüla, ta Congress-isa takhangba agütsü.
“Brihostibarnü Centre-i totzü jenjang ajem saka ano maneni jenjang atutsü tenzükogo. Iba mapa ajanga sorkari temela ana dener jembiba aser anemsü mapa inyakba jungkai adoka sayur” ta Congress otongdar Pawan Khera-i osangbener dang ashi.
Centre-i petrol aser diesel litre nung nung sen 2.50 ajemba osang metetdaktsüba sülen tanü Congress-i Modi’er sorkar aitsü.
Centre-i totzü jenjang nung tebang mair ta ashir saka Karnataka assembly election mapang anogo 17 tashi jenjang memelenshi aser Gujarat assembly election nunga kasaji inyak, ta Khera-i ashi.
“GST kübok petroleum products dendakjang ta onoki takhangba agütsüba nenshia metetdaktsür. Iba amaji inyak nung dang election magidang tenüng tajung angutsü atema anemsü mapa inyakba samatsütsü” ta paisa metetdaktsü.
“Ghar-ghar Modi” (Modi in every home)” sülen “bye-bye Modi” mapang tonga aruogo. Sorkari GST kübok petrol aser diesel dendaktsüba ajanga dang nübortem menüremtsü, ta paisa shisem.
Totzü company temi sen crore lakh 13 dak tema bendenogo aser iba jagi sorkar senpong süngdaktsür. Iba senji sorkari event management aser publicity nung endoker, saka Ayushmaan Bharat scheme atemabo parnoki sen crore 2000 dang lemzüktsü, ta Congress atema otongdarisa ashi.
Centre nung BJP sorkar akümba sülen petrol nung central excise duty 211% aser diesel nung 443% ajungketogo, ta paisa shisem.