Mizoram-i Nov 28 election atema renema lir

Aizawl, Mongputeni (October) 9 (Agencies): Mizoram state election ketdangsertemi November 28 nü Assembly election agitsü atema mapa renemogo, ta State Chief Electoral Officer (CEO) S B Shashank-i ashi.
Vote agütsür 7,68,181 nungi tetsür 3,93,685 lir aser parnoki polling stations 1,164 nung vote agütsütsü, ta paisa ashi.
Manipur den arrtsüa aliba tesem nung polling stations 10 nung lendong ataloktsü akok ta züngoka lir. Polling station temji Tuivawl constituency nung Zokhawthiang, NE Tinghmun, Sailutar, Sunhluchhip & Ratu- I & II aser Chalfilh constituency nung NE Tlangnuam & Daido lir.
Assembly menden 40 atema election ji November 28 nü agitsü aser nomination asüba anogo tatembangbaji November 9 nü asütsü.
November 12 nü nomination paper reprangtsü aser November 14 tashi nung nomination agientsü akok. Election indang vote ji December 11 nü azüngtsü.