Chhichhore film nung Shraddha aser Sushant nati shilem agitsü

Mongputeni/October 9, 2018 (Agencies): Dangal film kanga takok ngua sayaba sülen film yanglur Nitesh Tiwari-i taruba film nüngja aser film nung shilem agitsüpurtem sangdongogo. Film nüngja ‘Chhichhore’ agütsüogo aser iba nung Sushant Singh Rajput, Shraddha Kapoor aser Prateik Babbar nungeri tongti shilem agitsü aser Fox Studios India-i produce asütsü. Iba film ya 2019 küm tatemlen sayatsü imlar.
Osang ajanga ashiba agi, iba film ya engineering college ka nung atalokba indang asütsü kong actor asem indang taküm, career aser temeimtep indang sayutsü.
Iba film nung Prateik-i antagonist shilem agitsü aser iba film nung mezüngbuba pa Sushant den külemi shilem agitsü.
Maneni film shilem karbo Nitesh taküm nung ajangshiba dak ajemdaker yanglutsü, kechiyong director ya engineering college ka nung züngogo. Kasa mapang nung Sushant-a engineering school ka nung zünga liasü.
Mapa tsütsü Sushant Singh Rajput, Abhishek Chaubey indang film Son Chiriya film tangokzükogo aser tang The Faults In Our Stars remake Kizie Aur Manny nung shilem tagidak lir. Kasa mapang nung Shraddha Kapoor Stree aser Batti Gul Meter Chalu nung shilem agiba nguogo. Actress ya tang South Indian film Saaho nung shilem agitsü asoshi renemshiba mapang ka lir.