Afghan election nung tokteper ka suicide lendong nung asü

Mongputeni/Oct. 09, 2018 (Agencies): Afghanistan indang Helmand province nung election senden ka mena lia taküm bendanga agütsür bomb pokloktsüba lendong nung taruba parliamentary election atema candidate ka densema nisung ti taküm sama, ta provincial ketdangsürtemi ashi.
Sangtennü Saleh Mohammad Achekzai ya Helmand yimtiba, Lashkar Gah nung par ki jakdang senden mena lia suicide bomber yagi pa temang nung inoka aliba bomb tesashi ya pokloktsü.
Iba bomb ajanga Achekzai anükera dena pokset, ta southern Helmand provincial council tekolakba, Attahullah Afghan-i The Associated Press dang telephone ajanga ashi.
Mongputeni/October 20 nung agitsü aliba parliamentary election atema Rongjui/September 28 nungi nübuyim tenzükba sülen parliamentary candidate dak tenük yoker iba ama lendong agütsüba ya tang agi tanabuba lir.
Züngsem 249 atema tokteper candidate 2,565 lir aser item rongnung tetsür candidate 417 densema lir.
Nangarhar province anüdoklen Mongputeni/October 02 nü rally ka agiba mapang lendong agüja nisung 13 asü aser 40 dak tali yirua liasü.
Küm asem dang tali agi menur agitsü aliba election atema renemshiba nung ita aika mangatettep adoka arur aser iba election ya agütsü asü masüar ano mejangjai lir.
Bureaucrat temi mapa shidak meinyakba aser ashikülak mapa inyakba ajanga iba election ya koba tashi ochishia inyaktettsüar mejangjateti lir.
Taliban telungpurtemibo iba election nung shilem magitsü metetdaktsüogo.
“Iba maparen takok ngua inyaktettsü asoshi nüburtem shirnokisa teyari agütsütir tenük yoktsü,” ta Taliban odongtar, Zabihullah Mujahid-i tawa sangdong ka nung shia lir.
Pakistan den arrtsüa aliba Helmand tesem ya mapang talangka Taliban telok kübok liasü aser 2001 küm nungi tenzüka US-i aniba Afghan mitkartemi atsüngdok.