FM Tragopan küm ka ajungba anogumung amung

Dimapur, Mongputeni/October 09 (TYO): FM Tragopan mezüngbuba anniversary AIR Kohima nung Mongputeni/October 09, 2018 nü kaogo. Iba sentong ya Vemucho Chuzho lennisüba kübok aka.
Sentong nung Program Executive, L. K. Mulony-i o jembiba mapang, AIR nung inyakertem aser media lokti tentet longjemer pungmang ka asangsang kümdaktsütsü asoshi inyakba atema parnok tenüng asang. Paisa FM Tragopan nükjidong tongtibangtibaji iba station angartem nem lenla tuluba ayimjema sentong tajungba agütsütsü asoshi aser broadcasting system tajungba küma melenshitsü asoshi lir, ta ashi.
Paisa, Tragopan nüngja ya state ozü tenüng nung jatsü koba ‘endangered species’ ka lir aser Nagaland nung timba angur, ta ashiba den iba nüngja agütsüba ajanga Nagaland nung aliba lanurtem nem arem shiruru aser süngtonglitong wazüka ayutsü asoshi osang ka agütsütsü asoshi lir, ta ashi.
Mulony-i ashiba agi, news ya media inyakyim nung tongtiba lir aser regional news tem kin balala oshi nung agütsüba den English news anogo shi broadcast asür ta ashi. Paisa yimdak yimtsüng nung alirtem tongtettsü atema ‘Bosti Manohar Karne’ programme yokdar ta ashi.
Maneni RJ tem tenüngsanga Mulony-i ashiba agi, parnok mapa tajung ajanga tangartem aika atsüa aruogo, koba FM Tragopan nükjidong tongtibangtiba ka lir. Paisa FM Tragopan ya kümtem tsüngda nüngtuguba küma odar ta ashiba den nisung ajak dang tejaklen arua iba station tajungba kümdaktsütsü aser tarutsü nung tetsükdaktsütem külemi longjemer bentettsü ayongzük.
Sentong nung Assistant Director (P) aser head of Office, N Kaimany Chang-i lokti pelaa agizükba o jembi aser cake lemsaba sentong nunga pai shilem agia liasü. Maneni Assistant Engineer, PS Tripathi, , RJ tem aser News Section nungi o tatsütsü jembia liasü. Tepela anküp o News Reader Jonas Yanthan-i jembi aser Seyievinuo Chuzho aser AIR staff temi ken tena liasü, ta ketdangser sangdong ka ajanga metetdaktsü.