NSF-i ashishitepba Governor’s Secretariat-i jangjatsür

Dimapur, Mongputeni (October) 9 (TYO): Naga Students Federation (NSF)-i Mahatma Gandhi asoba tenüng nung Quiz Competition ayonga agiba dak sendakba nung ashishitep ken o atema Governor’s Secretariat, Raj Bhavan Kohima-i osang jangjashitsü.
Ministry of Home Affairs, Government of India-i tuyuba nung ajemdaker Governor’s Secretariat-i Department of Higher Education, Nagaland aser Nagaland University dang tetoktepba ayonga agitsü osang metetdaktsü. Mezüngbo October 2, 2018 nü Raj Bhavan Kohima nung senpet agütsütsü lemtet. Ajisüaka, September 15, 2018 nü Nagaland Governor PB Acharya menden ser amenba senden nung senpet masü saka kulikaket aser tanga sempettem agütsütsü lemtet, ta Governor’s Secretariat-i sangdong ka nung metetdaktsü.
Iba senden nung Department of Higher Education, Nagaland College Principals Association aser Nagaland University nungi teshimtet nübotem dena liasü aser olemtepba sülen senpet magütsütsü lemtet. Senden nungsa Raj Bhavan-i Kohima aser Dimapur district tem dak alaka tanüngba district tem nungi arurtem indang Travel Allowances den chiyungtsü aser tanendak atema sen agütsütsü lemtet, ta parnokisa ashi.
Iba nung ajemdaker Governor-i Department of Higher Education dang district ajak nung Quiz Competitions ayonga agitsü aser October 2, 2018 nü Raj Bhavan nung takoker nem sempet agütsütsü osang metetdaktsü, ta Governor’s Secretariat-isa osang jangjashitsü.