NPF-i kobi melii sorkar tasen ka akümtsü: TR Zeliang

Kohima, Mongputeni (October) 9 (TYO): People’s Democratic Alliance (PDA) sasep nung mangatettep adoka lir anungji Naga People’s Front (NPF)-i Nagaland nung sorkar tasen ka akümtsü ta Mongulbarnü Opposition lennir T R Zeliang-i metetdaktsü.
“NPF ya tang Nagaland nung MLA timba aliba political party lir” ta paisa ashi. NPF MLA 26 nungi teneti Nationalist Democratic Progressive Party (NDPP) aser BJP nung adentsü mulunga lir ta NDPP-i ashiba aija taoba Chief Minister, TR Zeliang-i “NPF sasep nung telemsa kecha adoka mali” ta ashi.
NDPP-i aniba PDA sorkar loksatsütsü atema meranger ta osang jembiba atema TR Zeliang-i ashiba agi, “NPF Legislature Party-i kü nem aser Party-i tir nem teloktep sorkar ka akümtsü atema tashi agüja lir aser iba ama mapaji inyaktsü süra, ajaki haihaura kaa ang inyaktsü.”
“Teloktep sorkar kaji mashii mapang ka nung akümtsü akok saka terenlok aser tejakleni aotsü atema sorkar takang ka akümtsüla. Sorkar jagisa Indo-Naga yimten tebilemtsü latettsü atema inyaktsüla” ta paisa shisem.
“Tang aliba PDA sorkar ama masü saka sorkar takang ka akümtsüla. Sorkar tajung ka kümtettsü ta temulung lemtettsüsa tensa ka majuru tashi asenoki teloktep sorkar makümtsü” ta TR Zeliang-i party züngsemtem aser lennirtem dang ashi.
PDA sorkar loksa aotsü tia ka nung lir kechiyong parnoki lenmang tajung yanglutsü aser terenlok bener arutsü nangzük, saka sorkar kümteter ita 7 shi süiaka taoba NPF sorkari tenzüka toktsüba mapa ang parnoki inyaker, ta Opposition lennirisa ashi.
“Tang inyakba mapa ajak ya taoba NPF sorkari tenzüka yutsübatem lir. PDA-i tiyazü tenangzükbatem ajanga nübortem ashioktsütsü meranger. Parnoki ita tenet tsüngda scheme kecha bener marutet kechiyong taoba sorkar mapang MGNREGA schemes atema lemzüktsüba sen crore 283 parnoki (PDA)-i tangaleni belena amshi” ta paisa metetdaktsü.
PDA sorkari sen tangalen amshiba ajanga sen crore 300 dak tema indang Utilisation Certificate magüteteter. Iba jagi Centre-i MGNREGA kübok senotsü agütsüba sota lir, ta TR Zeliang-isa shisem.
Nagaland House Kolkata atema Nagaland-i küm ka nung sen crore 2.2 taa angutsüla saka ita nung sen lakh 5 ang angur, saka PDA sorkari iba atema khuret mabener. Nagaland nunga parnoki NDPP secretary general Abu Metha nem ita nung sen 15,000 atema Millennium Hotel (State Tourist Resort) Kohima agütsüogo aser ano party züngsem kar nem Old DC Bungalow agütsüogo, ta TR Zeliang-i metetdaktsü.
PDA sorkari aibelenba aser tim mesüi inyakba mapatem party züngsemtemi tenoktenoka mita reprangtsüla aser public nem iba osang metetdaktsütsüla, ta paisa ashi.
“Asenok teimla mesamali kechiyong asenoki kobi melii sorkar tasen ka akümtsü” ta TR Zeliang-isa party züngsemtem ayongzük.
Senden nung NPF tir aser taoba chief minister Dr Shurhozelie Liezietsu-ia o jembidang, “züngsem 60 agi akümba assembly nung NPF MLA 26 lir aser State Assembly indang otsü nung opposition tesashitibaji tang ya lir” ta ashi.
“Sorkar akümtsü atema mariteper saka asenok kanga kümdangtsübaji asen den toktepertemi oulutem prokshiba nungi jenbua alitsüba lir” ta Dr Shurhozelie-i party züngsemtem ayongzük.
Tanü CEC senden nung mendenji NPF secretary general aser Rajya Sabha MP K G Kenye liasü, MLA Dr Ngangshi K Ao-i temoatsü meshia sarasadem, MLA CL John-i tesentepertem pela agizük aser ex-Minister P Longon-i anküp tepela o jembi.
Tanü NPF Central Executive Council (CEC)-i Tir Dr. Shürhozelie Liezietsu aser NPF Legislature Party lennir T. R. Zeliang na lenisüba kübok anidaktsü bangzüngtep.