Meghalaya nung MR Vaccination Campaign takok ngua agir

Shillong, Mongputeni (October) 10 (Agencies): Meghalaya nung Measles Rubella Vaccination Campaign (MRVC) ajanga takok ngua agir.
Tang tashi nung tanur lakh asem dak tema nem measles aser rubella mozü agütsüogo.
Shillong nung osangbener den jembidang State Health and Family Welfare Minister, A L Hek-i Meghalaya nung Measles Rubella Vaccination campaign takok ngua inyakba osang metetdaktsü.
October 8, 2018 tashi nung tebur 1,88,566 aser tetsür 1,93,855 nem measles aser rubella anema mozü agütsüogo aser parnok ajak senteper tanur 3,82,421 lir, ta Health and Family Welfare Department secretary Pravin Bakshi-i ashi.
Social media sabangtem nung olulu prokshiba ajanga iba mapa inyakba nung tetsükdaktsü kar ajuru, ta Bakshi-isa ashi.
Social Welfare Department-i yaritepa Health and Education department teloktemi olulu aser tiyazü osangtem atema kuli tejangja agütsütet, ta paisa shisem.
Mozü agiba nung timtem kecha mali ta sayutsü atema Deputy Commissioner, sorkare ketdangser, doctor aser nurse aikati tamasa pei pei tanurtem nem mozü agütsü, ta Bakshi-isa metetdaktsü.