SC-i Centre dang Rafale deal telemtetba agiba osang meshir

New Delhi, Mongputeni/October 10 (Agencies): Tanü Supreme Court (SC)-i Centre sorkar dang France dang nungi Rafale tayimtsü alitsü atema telemtetba agiba inyakyimtem osang agujang, ajisüaka item osang nungji tayimtsü jenjang aser technical osangtembo menüngdaker, ta metetdaktsüogo.
Chief Justice Ranjan Gogoi aser Justices S K Kaul den K M Joseph nungeri akumba bench-i, temepishiba shiditem nung aliba ochimashibo parnoki mezüngoker, ta metetdaktsü.
Court nung temepishiba onüktem benokba ashishia Centre-i, temepishiba shiditemji magizüktsüla, kechiyong ibaji yimtenren nung ajangzüktsü atema benok, ta ashi.
Attorney General, K K Venugopal-i SC dang, Rafale deal onük nung tasüngdangbatemji national security den sendaktepa lir, anungji ibaji judicial-i mereprangshitsüla, ta ashi.
SC-i Centre dang Rafale tayimtsü alitsü atema telemtetba agiba inyakyimtemji tezüluba nung envelope ka nung shibanger Mongputeni/October 29 tashi nungbo agüjang, ta ashi. Iba ken o maneni Mongputeni/October 31 nü angadangtsü.
SC-i Centre dang UPA sorkar mapang aser NDA sorkar na yimsüsüba mapang jenjang atetba tepila osangji envelope ka nung shibanger court nem agüjang, ta tuyu.
Congress lenir aser RTI activist, Tehseen Poonawala-ibo Rafale deal anema temepishiba ken o benoka aliba pasasa agienogo.
Rafale deal ya France dang nungi Rafale fighter jets 36 alizüktsü atema India aser France sorkar na tsüngda tezüngzüktep agiba lir.
Rafale fighter ya twin-engine Medium Multi-Role Combat Aircraft (MMRCA) lir aser iba ya France nunger aerospace company Dassault Aviation-i yanglur.