Ango nung formalin maneni reprangtsüla: BAN

Dimapur, Mongputeni (October) 10 (TYO): State sorkari formalin ama temang nung timtem agütsüba mozü enokba ango meyokdaktsüba atema pelar, ta Business Association of Nagas (BAN)-i ashi.
Formalin ya tasümang shizüka maotsü atema amshiba chemical ka lir. Iba chemical ya tanü asüng ango aser tanga chiyungtsütem nung enoker aser temang nung tashidak adokdaktsür, ta Media Cell, BAN sangdong ka nung ashi.
Health & family welfare department-i chiyungtsü nung chemical amshiba noktangba atema tenüngsang agütsür aser iba ajanga nübortem tashidak balala aser cancer nungi jenbutsü. State sorkari ango ayokba kanga junga mita reprangtsüla, kechiyong asen state adena orr aliba state tem nungiang ango bener arur. Anungji state sorkari chiyungtsütem jungjunga tendangtsüla aser iba sülen jiang ayoktsü junger ta kuli agütsütsüla, ta parnokisa metetdaktsü.
Naga nunger aser entrepreneur temi ango metsüba mapa inyaktsü BAN-i ayongzüker. Asenoki tangar dang nungi dang ango bener arua mechii asenok sasa metsütetba ango agi asenok peritsüsa inyaktsüla. Fishery department-i ango metsürtem yaritsüla aser ango chanu tajungtem bener arua metsüdaktsütsüla, ta BAN-isa ashi.
Tanü asen state nung ango metsütetbaji 8200 MT lir aser ibaji asenoki nüngdakba nung 30% shi ka lir. Anungji Nagaland state fishery department-i ango peria metsütettsü atema mapa inyaktsü mepishir, ta parnokisa shisem.